Madaxweynaha Panama, Jose Raul Mulino, ayaa si kulul uga jawaabay hadal kasoo yeeray madaxweynaha Mareykanka, Donald Trump, oo sheegay in Mareykanku uu “dib u qabsanayo” kanaalka Panama.
Hadalkan ayaa yimid kadib markii Trump uu ka hor sheegay xubnaha Kongareeska Mareykanka in ay bilaabeen sidii ay dib ugu soo celin lahaayeen maamulkii kanaalka Panama si loo xoojiyo amniga qaranka Mareykanka.
Jose Raul Mulino, oo hadalkiisa ku baahiyay bartiisa X, ayaa sheegay in kanaalka Panama ay dadkiisii joogaan, aysana jirin wax dib loo celinaayo.
“Waxaan ku gacan seyrayaa, aniga oo ku hadlaya magaca Panama iyo dhammaan shacabka reer Panama, gardarradan cusub ee loo geysanayo runta iyo sharafka qaranimadeenna,” ayuu Mulino ku yiri bayaan uu soo saaray.
Kanaalka Panama, oo isku xira badaha Atlantic iyo Pacific, ayaa ah marin aad muhiim ugu ah ganacsiga caalamiga ah, waxaana tan iyo sanadkii 1999 loo wareejiyay maamulka Panama kadib heshiis ay horay u gaareen labada dal.