Waxay lahayd hammi iyo hiigsi nololeed, Najma Rashiid Cabdiqaadir, waxay ahayd gabar muddo kooban ka hor Gaarisa ka dhamaysay dugsiga sare, mustaqbalkeeduna u ahaa mid riyooyin badan leh.
Najmo, waxay timi Nairobi bilo uun ka hor si ay u raadsato fursad shaqo iyadoo ku noolayd guri ay habaryarteed leedahay.
Qoyskeeda ayay najmo uga tmid si ay u hesho fursad shaqo si ay u garab istaagto.
Ruqiyo Kedsane Caraale, oo ah hooyada Najmo Rashiid, allaha u raxmadee oo BBC-du la hadashay ma awoodin inay nala hadasho, waxayna si dareen leh u sheegtay inay ku qanacday waxaa Alle qadaray.
Waxay ku jirtay safar ay doonaysay inay ku soo eegto hooyadeed oo xanuunsanaysay oo deggan Gaarisa basle naftu kuma siman inay aragto, oo waxay ku dhimatay shil doon oo ka dhacay webiga Tana Riva, shilkaas oo ay 23 qof oo ay Najmo ka mid ahayd ku qaraqmeen webiga.
Ismaaciil Carraalle, oo aad ugu murugaysan geerida Najmo oo adeerkeed yahay ayaa BBCda u sheegay in ay ahayd qof karti badan oo doonaysay inay heer nolosha ka gaarto.
“Aabbaheed ayey la hadashay oo ay u sheegtay inay rabto inay soo raacdo doonta, wuxuuse aabbaheed yimi daanta kale biyaha si uu ugu sugo, balse waxaa dhacay shilka doonta, xaaladduna waxay gashay jaahwareer iyo murug qoyska oo dhan” ayuu yiri Carraalle.
Adeerkeed ayaa BBC-da u sheegay in Najmo ay la socotay gabar ay saaxiib yihiin oo loo sheegay inay badbaadday.
XIGASHADA SAWIRKA,SOCIAL
Caraale, wuxuu kale oo sheegay in ka hor geerideeda ay sidoo kale telefoonka kala hadlaysay hooyadeed oo ay ku sii jeeday basle qadartu ay dhacday.
Najmo, waxay muddadii ay Nairobi joogtay baratay qurxinta iyo cilaan saarka dumarka oo ah xirfad ay doonaysay inay shaqo ku hesho , Adeerkeed Caraale ayaa BBC-da u sheegay “Geerideedu si gaara ayey aniga ii xanuujisay oo aad ayaan uga danaqday, waxay ahayd gabar yar oo firfircoon oo baariyad ah”
XIGASHADA SAWIRKA,REUETERS
Khasaarihii ugu danbeeyey ee fatahaadaha Kenya
XIGASHADA SAWIRKA,REUETERS
Kooxaha samatabixiyaasha Kenya ayaa sheegay inay 91 qof wali la la’ayahay ka dib fatahaadaha xooggan ee ay sababeen roobabka mahiigaanka ah ee ka da’aya guud ahaan Kenya.
Subaxnimadii isniinta ilaa 46 ruux ayaa ku dhintay deeganka Maai Mahiu ee bartaha kenya sida ay sheegtay wasaaradda arrimaha gudaha ee Kenya.
Inta la xaqiijiyey 169 ayaa ku dhintay daadadka iyo roobabka mahiigaanka ah ee wali ka socda dalka iyadoo sidoo kale daadadku ay cagta mariyeen guryo tiro beel ah oo dalka oo dhan ah.
Ilaa hadda afar Ismaamul oo ay ka mid yihii Tana River, Nairobo,West Pakot, Homa Bay ayaa ah kuwa ugu daran ee masiibada fatahaaduhu ay waxyeeleeyeen.
Homa Bay iyo Garisa, ayaa laga soo sheegay dhimasho hor leh. Taliyaha booliska Ismaamulka Nakuru, Samuel Nyandi ayaa sheegay in wali kooxaha samatabixiyaasha ay ku howlan yihiin sidii loo heli lahaa dadka la la’ayahay.
Ilaa soddon kun iyo dheeraad qoysas ayaa ka baracay gurhayooda. Deeganka Sindo, ilaa oo ka tirsan Ismaamulka Homa Bay ilaa 161 kun oo qoys ayaa barakacay.
Xogaha dowladda ayaa ku qiimeeyey in 190,942 kun oo qof ay waxyeelo gaarsiiyeen masiibadan dabiiciga ah ee ku dhufatay dalka.
“ Waxaa si firfircoon u wada howlaha baaritaanada, samatabixinta iyo howlgalka rajo soo celinta gaar ahaan Nakuru, halkaas oo dhoobo soo butaacday ay iyo ilaa 23 qof oo kale oo la soo badbaadiyey” ayaa lagu yiri bayaanka wasaaradda arrimaha gudaha Kenya.