Madaxweynaha Somaliland Muuse Biixi Cabdi oo ka hadlay Doorashada ayaa soo jeediyay in laga fogaado wax weliba oo keeni kara khilaaf, isku dhac iyo kala xulashada xubnaha kuraasta ku fadhiisana ee Dadka metalaya.
Muuse Biixi ayaa carrabka ku dhuftay in kala xulashada xubnaha wakiillada ka noqonaya Shacabka ee ku metalaya Maamulka in loo baahan yahay in si heer sare ah loo hubsado si loo helo xubno aqoontoodu sarreyso.
Biixi ayaa soo jeediyay in meesha laga saaro kala qub-qubka beelaha iyo dadka wax soo xulaya waxaana uu ku taliyay in laga fogaado waxyaabaha daahin kara doorashada ama nuxurka dadka waaya-aragga ah ka reebaya sida uu hadalka u dhigay.
“Sanadkani waa sanad Doorasho, waxa ay ila tahay in haddii aan mar hore loo eegin qofka xilka qabanaya toloow yuu noqon karaa balse la dhaho Dowladdii waxa aan rabnaa hab qaaraanka oo kale ah ee aan la dooran qof qaanuunka & nidaamka yaqaana oo aragti dheer leh la doorto laakiin ma ahan in la dhaho shalay reer hebel ayaa qaatay ee maanta Dadka halaga qaybgeliyo, dee waxa aan leenahay dadka wax yaqaanna halaga qaybgaliyo” Muuse Biixi Cabdi, Madaxweynaha Somaliland.
Waxa uu dhaliil kala dul-dhacay xubnaha mucaaradka ah ee doonaya in Xukuumadda & Xisbiga Kulmiye talada kala wareegaan waxaana uu sheegay in aanay u diyaarsaneen Doorashada balse ay ku mashquulsan yihiin in ay qoraan warqado dacwado ah oo beesha caalamka loo dirayo.
Muuse Biixi ayaa intaas ku daray in Xukuumad ahaan go’aamiyeen in Doorashadu ku dhacdo waqtigeeda, waxa uu Xisbiyada Mucaaradka ah ugu baaqay in ay daacad ka ahaato oo lugaha uga fuqaan Doorashada ay ku dhegan yihiin sida uu hadalka u dhigay.
“Si aynu u kala nabadgalno, musuq looga cararo waxa aynu qarash Shan milyan ah gelinay in isha bu’deeda la sawirro, Haddii aynu nahay Xukuumadda waan fulinaynaa sharciga Doorashada, Sharci Doorasho haddii aad is hor istaagtana adiga ayaa cirka roob ku og” Ayuu yiri Muuse Biixi Cabdi Madaxweynaha Somaliland.
Mucaaradka Xukuumadda Madaxweyne Biixi ayaa laga warsugayaa jawaabta ay ka bixiyaan eedaha uu xalay u jeediyay ee la xiriira in ay ka caga-jiidayaan Doorashada isla markaana ay Beesha Caalamka u dirayaan Warqado dacwo ah oo ay ku sheegayaan in Doorashada uu diidan yahay Madaxweynaha Somaliland ama uu dib u dhigayo.