Mucaaradka dowladda oo ay ka mid yihiin madaxweynayaashii hore iyo Ra’iisul Wasaarayaashii hore ee dalka ayaa dhaliil kala kulmay bulshada, ka gadaal markii ay ka gaabsadeen ka hadalka Markabkii siday Hubka ee ay gacanta ku dhigeen ciidamada Puntland July 18, 2025.
Warsaxaafadeed ay soo saartay dowladda Soomaaliya ayaa maamulka Puntland ku eedaysay in ay afduubteen Markab lagu magacaabo MV SEA WORLD kaas oo siday shixnad ciidan, oo ay leeyihiin ciidamada Turkiga iyo Ganacsato Soomaaliyeed.
Maamul Gobaleedka Puntland oo ka hadlay warka ka soo baxay dowladda dhexe ayaa qaadacay, iyaga oo sheegay in Markabka siday saanad ciidan, ay ciidamada Puntland ka qabteen Xeebta Bareedo, ka gadaal markii ay ugu tageen Markabka oo dul saaran ciidamo Maleeshiyaad ah.
Dowladda Soomaaliya oo falka ay ku gacday Puntland ku sifaysay mid ka hor imaanaya qarannimada iyo midnimada ayaa dhanka kale waxaa jiray gaabis iyo dhaliil loo jeediyay mucaaradka dowladda, oo laga sugayay ka hadalka dhacdadaan oo bulshada dhexdeeda hadal hayn ka abuurtay.
Mucaaradka oo lagu yiqiinay ka hadalka khilaafka iyo arrimaha siyaasadeed ee soo kala dhexgala dowladda dhexe iyo maamul gobaleedyada ayaa hadda u muuqda kuwa sii guranaya.
Qabsashaday Markabka ka dib dowladda Soomaaliya ayaa gobolka Gedo waxa ay u dirtay Cabdirashiid Janan oo ku magacaaban Taliyaha NISA ee gobolkaas, kaas oo dagaal kula galay magaalada Beledxaawo ciidamada maamulka Jubbaland.
Falkaan ayaa mucaaradka waxa ay ku sheegeen in ay ka xunyihiin, iyaga oo dowladda Soomaaliya ku dhaliilay tallaabadaan oo ay ku sifeeyeen in ay fursad siinayso cadowga ummadda Soomaaliyeed, ka dib warsaxaafadeed ay soo saareen July 22, 2025.
Talihii hore ee NISA Fahad Yaasiin ayaa mucaaradka ku dhaliilay sida ay uga gaabsadeen ka hadalka dhacdadaan, isaga oo yiri, “Madasha Samatabixinta Soomaaliyeed, si sahal ah waraaqo wey u soo saari karaan marka ay kasbanayaan dareenka Axmed Madoobe iyo Saciid Deni, laakiin way ka aamusayaan marka Dowladda Federaalka laga gardaran yahay. Waa muhiim inay muujiyaan dareen qarannimo, ayna Dowladda Federaalka garab istaagaan marka la afduubanayo hanti ay Dowladda Federaalka si sharci ah ku fasaxday.”
Dhacdadaan ayaa mucaaradka hor dhigtay waydiimo dhawr ah, waxaana weli bulshada sugayaan go’aankooda ku aadan Markabka ay gacanta ku dhigeen ciidamada Puntland.