Ruushka ayaa ku eedeeyey Maraykanka inuu lahaa gantaalladii Ukraine ay u adeegsatay weerar lagu qaaday magaalada Sevastopol ee gobolka Crimea ee la haysto, kaas oo ay ku dhinteen ugu yaraan afar qof oo labo ay carruur yihiin halka ugu yaraan 150 kalane dhaawac ka soo gaaray sida saraakiisha Ruushku sheegeen.
Wasaaradda difaaca ee Ruushka ayaa sheegtay in gantaallada ay adeegsatay Ukraine ay ahaayeen gantaallada ATACMS ee uu Maraykanku u keenay dalkaas, waxayna ku andacootay in gantaalladaas ay diyaariyeen khubaro Maraykan ah.
Afhayeenka Kremlin-ka Dmitry Peskov ayaa weerarka ku tilmaamay mid waxashnimo ah, wuxuuna Mareykanka ku eedeeyay in uu “dilay caruur Ruush ah”.
Waxa uu farta ku fiiqay hadaladii ka soo yeedhay madaxweyne Vladimir Putin, oo dhawaan wacad ku maray inuu beegsan doono dalalka hubka siiya Ukraine.
Moscow, ayaa sheegtay in difaaca cirka ee Crimea ay qabteen shan gantaal oo ay ku raran yihiin madaxyo ay soo rideen ciidamada Ukraine.
Muuqaalo laga sii daayay TV-ga dowladda Ruushka ayaa muujinayay qalalaase ka dhacay xeebta deegaanka Uchkuyevka, iyadoo dadku ay ka carareen burburka.
Wasaaradda difaaca ee Ruushka ayaa Axadii sheegtay in dhammaan gantaalada ATACMS ay diyaariyaan khubaro Maraykan ah oo ay hagaan dayax gacmeedyada Maraykanka.
Afhayeen u hadlay Golaha Ammaanka Qaranka ee Aqalka Cad ayaa BBC-da u sheegay: “Ukrayn waxa ay samaysaa go’aamo bartilmaameed ah oo ay iyadu samayso.”
Maraykanka ayaa gantaalada ATACMS siinayey Ukraine hal sano ka hor. Nidaamkaas wuxuu u oggolaanayaa ciidamada Ukraine inay weeraraan bartilmaameedyada ilaa 300km (186 mayl), sida ay sheegtay shirkada Lockheed Martin.
Ruushka ayaa si sharci darro ah ugu darsaday dhulkiisa jasiirsada Crimea sanadkii 2014-kii, dalal tiro yarna waxay jasiiradda u aqoonsan yihiin dhul Ruush ah. Sidaa darteed kuma hoos dhacayso dalabaadka Mareykanka ee ah in Ukraine ay ka fogaato adeegsiga hubka ay Washington bixiso si ay ugu weerarto dhulka Ruushka.
Laakin Mr Peskov ayaa wariyeyaasha ugu sheegay magaalada Moscow isniintii in “ku lug lahaanshaha Mareykanka, ku lug lahaanshaha tooska ah, ee ka dhashay dilka rayidka Ruushka, ay noqon karto cawaaqib xumo”.
“Waqtiga ayaa sheegi doona waxa kuwani noqon doonaan,” ayuu raaciyay.
XIGASHADA SAWIRKA,GETTY IMAGES
Wasaaradda arrimaha dibadda ee Ruushka ayaa u yeertay safiirka Mareykanka Lynne Tracy isniintii, ka hor inta aysan soo saarin bayaan ay ku eedeysay Mareykanka inuu ku lug leeyahay “fal bahalnimo” oo ay wacad ku martay inuusan noqo doonin”ciqaab la’aan.”
Xukuumadda Moscow ayaa marar badan ku hanjabtay inay beegsan doonto dalalka hubka siiya Ukraine, iyadoo sheegtay inay yihiin bartilmaameedyo milateri oo sharci ah.
“Waxaan si fiican u aragnaa cidda arrintan ka dambeysa,” Mr Peskov ayaa u sheegay suxufiyiinta.
Madaxweyne Putin, ayaa todobaadkii hore waxa uu ka hadlay cidda beegsanaysa gantaalladan tignoolajiyada ah ee isku dhafan ee bartilmaameedyada ah, kuwaas oo soo bandhigaya kuwan.
XIGASHADA SAWIRKA,AFP
Horaantii bishan, Mr Putin waxa uu soo cusboonaysiiyay hanjabaadda mar uu la kulmayay wakaaladaha wararka ee caalamiga ah.
“Haddii qof uu isleeyahay waa suurtogal in hubkaas la geeyo goob dagaal oo dhulkeena lagu soo weeraro oo dhibaato nagu abuurto, maxaa noo diiday in aan hub aan isku ayni nahay aan gaarsiino gobollo ka mid ah caalamka oo ay ka dhici doonaan weeraro. ee xarumaha xasaasiga ah ee wadamadaas (galbeedka)?” ayuu yiri.
“Taasi waan ka fikiri doonnaa,” ayuu raaciyay.
Saraakiisha Ukraine ayaa difaacay tallaabadan ka dib weerarka, iyagoo ku tilmaamay Crimea mid si sharci ah loo haysto.
Mykhailo Podolyak, oo ah kaaliyaha sare ee madaxweyne Volodymyr Zelensky ayaa sheegay in jasiiraddu ay dhaqan galisay “xero militari oo weyn” taas oo uu sheegay in lagu hayo “boqolaal bartilmaameedyo militari oo toos ah, kuwaas oo Ruushku ay isku dayayaan inay qariyaan oo ay ku qariyaan shacabkooda” .
Hawlgalka Qaramada Midoobay u qaabilsan la socodka xuquuqul insaanka ee Ukraine ayaa sheegay in ugu yaraan 10,000 oo rayid ah la dilay tan iyo markii uu Ruushku soo duulay bishii February 2022. Tirada dhabta ah, ayay saraakiishu sheegeen, inay aad u badan tahay.