Goobihii ay maalmo ka hor ka dheceen dagaallo hubka noocyadiisa loo adegsaday ee ku dhow deegaanka Qorilugud oo degmada Buuhoodle u jirta ilaa 40 kiilomitir ayaa maanta degganaa.
Odayaal ka kala socda degmooyinka Burco iyo Laascaanood ayaa gaaray deegaannadaas, si dhinac kasta uu uga arrinsado joojinta colaadda iyo wixii xal ah.
Odayaashaas oo wada dadaallo aan isku xirnayn ayey BBC-da la xiriirtay. Boqor Cismaan Aw Maxamuud Buurmadow oo ka mid ah odayaasha ayaa noo sheegay in isaga iyo odayaal kale ay hadda gaareen halka lagu dagaallamay, ayna la tashanayaan dadka iyo ciddii ay is leeyihiin sida uu sheegay way ka go’daa talada.
“Deegaan collaadeed ayaan u nimid, ciidamo badan oo is horfadhiya ayaan u nimid, deegaan colaadeed oo colaaddu aad u shidan tahay ayaan u nimid” ayuu yiri Boqor Buurmadow.
Odayaasha dhawaan gaaray ayaa sheegay in marka hore ay xaaladda qiimeynayaan ka hor inta aysan bilaabin howlahooda.
“Marka hore xaaladda ayaan qiimeyneynaa, waxaan la tashi ka sameyneynaa sida ugu habboon ee wax loo qaban karo kaddib ayaan cid la xiriiri karaan”. Ayuu yiri boqor Buurmadow oo intaas ku daray in aysan arrinta aheyn mid ay caadifad ku galayaan.
“Arrin aan caadifaad iyo deg deg ku galeyno ma ahan ee waa arrin aan dooneyno in aan si miisaman u galno”
Boqor Buurmadow ayaa sheegay in madax-dhaqameedkii talada hayay ay joogaan goobta si coladda loo joojiyo.
“Xaajadani waa xaajo soo noqnoqotay, maanta raggeenna talada reerka haya cidi ma maqna, maanta waa u nimid”.
Dhinacayada dagaallamaya ayey tahay marka hore in ay ka go’an tahay in ay joojiyaan dagaalka si loo gaaro nabad ka dhalata deegaanka, sida uu sheegay.
“Colaadda joojinteed hal dhinac kuma xirna, colaadda joojinteedu waxay ku xiran tahay labada docood” ayuu yiri boqor Buurmadow.
Dhinaca kalena, waxaan la xiriiray Garaad Saleebaan Bullaale oo jooga Buuhoodle. Waxaan wax ka weydiinnay dadaallada ay dhankooda wadaan ee dagaalka lagu joojinayo.
Garaadka ayaa noo sheegay in marka hore ay doonayaan in xabbad-joojin la sameeyo kaddibna ay waxgaradka wadahadlaan.
“Odayaasha dhinaca Buuhoodle oo aan aniga ka mid ahay howl-nabadeed bay ku jiraan, wixii dhacay dhaceen”.
Garaadka ayaa sheegay in hore ay u direen baaq nabadeed haddana ay ku jiraan sidii nabad loogu soo celin lahaa meelihii lagu dagaallamay.
Mar aan wax ka weydiinay waxa uu kala socdo odayaasha dhaqanka ee dhanka kale ka wada nabadda, waxa uu shegay Garaadka in aysan isla socon oo aysan war ka hayn.
Dagaalkan ayaa ka duwan sida la sheegay kuwa dhexmara beelaha ee ka bilowday dhulka iyo biyaha.
“Dagaalkan wuu ka duwan yahay dagaalladii hore, maamullada kama marna, sida uu ku socdana dagaal waxaan ka baqeynaa in uu noqdo mid isir ah oo riiq dheer”. Ayuu yiri Garaad Saleebaan oo intaas ku daray in dagaalkan uu siyaasad ku lug leeyahay
“Dagaalkan dhinac ayaa laga wadaa, maamulka Somaliland ayaana wada, qolada dhaqanka dhinaceena iyo dhanaca kale nabadda waa ka wada shaqeyn jirnay, laakiin xiisadda cusub ee hadda soo korortay waa mid doorashooyinka ku shaqo leh oo siyaasadeed, ma ahan tii hore aan ku wada joognay”. Ayuu intaa raaciyay.
BBC-da ma caddeyn karto Garaadka sida uu sheegay in dagaalkan ay maamulo ku lug leeyihiin balse sida uu sheegay Boqoro Buurmadow dhibaatada socoto ayaa ka xoog badan dadka nabadda wada.