Guddoomiye ku xigeenka Hay’adda Maaraynta Musiibooyinka Qaranka ee SODMA Dr Axmed Cabdi Aadan ayaa kulan gaar ah la qaatay Danjiraha Jamhuuriyadda Shacabka Shiinaha ee Soomaaliya Fei Shengchao iyaga oo kawada hadlay kaalinta Beijing & howlaha ay Hay’addu haysto.
Dr Axmed Cabdi Aadan oo ah ku xigeenka Hay’adda Maaraynta Musiibooyinka SODMA ayaa mahadcelin uu ka waday Guddoomiyaha Hay’addaas la wadaagay Danjire Fei Shengchao isaga oo sheegay in Dowladdiisa Shiinaha ay garab istaag u muujisay Soomaaliya waqti kaalmo loo baahnaa.
Dowladda Shiinaha ayaa kamid ah waddamo Soomaaliya ku gacansiiyay gargaar bani aadamnimo iyo kaalmooyin kala duwan waqtigii ay taagnayd saamayntii ka dhalatay Daadadka & fatahaadaha ka dhashay xaaladda El-nino ee saamaynta taban ku reebtay Dalkaan dhaca Geeska Qaaradda Afrika.
Hay’adda SODMA ayaa gargaarkaas ay guddoontay waxa ay u kala qaybiysay Dowlad-Goboleedyada & Gobolka Banaadir iyada oo ku salaysay sida ay u kala daran tahay baahida ka jirta deegaannadaas la geeyay oo ay ku sugnaayeen Dad ay saamaysay xaaladda Elnino ee isbaddelka cimilada salkeedu ku dhammaada.