Madaxweynaha Somaliland, Mudane Abdirahman Mohamed Abdullahi(Cirro), ayaa kulan kula yeeshay Madaxweynaha Kenya, William Ruto, madaxtooyada Nairobi, halkaas oo labada hoggaamiye ay ka wadahadleen xoojinta xiriirka labada dhinac, iskaashi dhanka ganacsiga, diblomaasiyadda, amniga gobolka, iyo is-dhexgalka bulshada.
Intii uu socday kulanka, labada hoggaamiye ayaa diiradda saaray sidii loo xoojin lahaa iskaashiga dhanka waxbarashada, is-weydaarsiga tacliinta sare, iyo horumarinta xirfadaha dhalinyarada.
Madaxweyne Ruto ayaa ku bogaadiyay Somaliland dadaalka ay ugu jirto xasilloonida iyo horumarka gobolka, wuxuuna ballan qaaday in Kenya ay garab taagan tahay Somaliland, gaar ahaan arrimaha la xiriira iskaashiga siyaasadeed iyo horumarinta dhaqaalaha.
Madaxweyne Cirro ayaa dhankiisa uga mahadceliyay dowladda Kenya soo dhaweynta diirran iyo martigelinta heerka sare ah ee loo sameeyay intii uu ku sugnaa Nairobi. Wuxuu carabka ku adkeeyay muhiimadda ay leedahay in la sii xoojiyo xiriirka Somaliland iyo Kenya, isagoo ku tilmaamay mid faa’iido u leh labada shacab.
Inta uu joogo Nairobi, Madaxweyne Cirro wuxuu la kulmi doonaa jaaliyadda Somaliland ee Kenya, gaar ahaan magaalada Nairobi, halkaas oo uu khudbado uga jeedin doono xaaladda guud ee Soomaliland , jihada ay xukuumaddiisu u socoto, iyo wixii ay qabatay 100-kii maalmood ee ugu horreeyay xafiiska.
Madaxweyne Cirro wuxuu caddeeyay sida ay uga go’an tahay xoojinta xiriirka Somaliland iyo dalalka gobolka, si loo helo iskaashi waara oo lagu horumarin karo nabadda, ganacsiga, iyo wadajirka shacabka.
Waxaa la filayaa in booqashadan ay dhisto sal adag oo u gogol xaaraysa iskaashi miro dhal ah oo labada dhinac ka dhexeeya mustaqbalka dhow.