Allaha u naxariistee waxaa xalay dalka Turkiga ku geeriyooday fannaan Cabdulkhaadir Maxamed Aadan (Aargute), oo kamid ahaa fannaaninta da’da yar ee sanadihii dambe ka howl galayay magaalada caasimadda ah ee Muqdisho.
Fannaan Aargute waxa uu dhaawac daran kasoo gaaray qaraxii lagu weeraray hoteelka SYL ee magaalada Muqdisho 14-kii bishii aynu soo dhaafnay ee Maarso, iyadoo ay weerarka geysteen ururka Al-shabaab.
Aargute ayaa dhaawiciisa loo qaaday dalka Turkiga si loogusoo dabiibo halkaas oo ugu dambeyn uu xalay ku geeriyooday.
Bahda fanka, saxaafadda mas’uuliyiinta dowladda iyo qaybaha kala duwan ee bulshada ayaa ka tacsiiyeyay geerida Cabduqaadir Maxamed Aargute.
Maxaan ka ognahay taariikh nololeedkii fannaan Aargute?
Allaha u naxariistee Cabdiqaadir Aargute waxa uu fankiisa kasoo bilaabay gudaha Muqdisho, halkaas oo uu kasoo shaac baxay, isagoo waayihii dambe ku ballaariyay dalka kenya gaar ahaan caasimaddiisa Nairobi oo uu muddo ku noolaa.
Aargute ayaa fanka si weyn usii dhex dabaashay markii uu yimid Nairobi, isaga oo ka qayb qaatay barnaamij faneedyo ka dhacay magaalada Nairobi oo ay ku lug lahaayeen arrimo siyaasadeed oo la xiriira dowladda Soomaaliya iyo shirar halkan ka dhacay.
Dhinca kale Aargute waxa uu kamid ahaa ciidanka xoogga dalka Soomaaliyeed isaga oo inta badan fankiisa ama heesaha uu qaado ku muujin jiray wadaninimo iyo jacaylka dadkiisa.
![Aargute](https://ichef.bbci.co.uk/ace/ws/640/cpsprodpb/f0e7/live/0c000990-fe4d-11ee-97f7-e98b193ef1b8.jpg)
![Aargute](https://ichef.bbci.co.uk/ace/ws/640/cpsprodpb/f0e7/live/0c000990-fe4d-11ee-97f7-e98b193ef1b8.jpg)
XIGASHADA SAWIRKA,SOCIAL
Waxaa jirtay hees uu soo saaray bilo yar kahor inta uusan dhaawaca la kulmin taas oo uu ku guubaabinayay ciidamada isla markaana halku dhiggeedu uu yahay, ‘Waxaan dirayaa farriin’.
Erayada heesta waxaa kamid ah:
Waxaan duurka u galoon
Dulukha u wareegayaa
Amaan qoray diiradliyo
Boobaha dusha ugu sitaa
Inaan cidi damac ka gelin
Dahabo ciiddeydiyeey
Damiir laawaha darbiga
Ka celshaan ahay
Amaan daba dhilifyadiyo
Nacabka dibadiyo gudaha
Dareenka la socdaan ahay.
Caasha-Kiin Cilmi Xaashi oo kamid ah fanaaniinta Muqdisho ayaa isla markaa ah gabadh uu Aargute u yahay adeer ayaa BBC-da uga warrantay waayihiisii faneed.
“Adeerkey fanaan Aargute, waxa aan ku xusuustaa in uu ahaa fanaan wadani ah, waxa uu mar walab diiradda saari jiray wacyi gelinta ciidamada iyo shacabkaba maadama uu ahaa askari dowladeed fankana kujira“, ayey tiri Caasha-kiin.
Aargute waxa uu dunida kaga tagay carruur iyo xal xaas sida ay noo sheegay Caasho-kiin.
“Aargute hadda ma jirin koox faneed oo uu si gaar ah uga tirsanaa, balse waxa uu si isku mid ah ula shaqeynayay dhammaan kooxaha fanka ee ka dhisan Muqdisho, waxaase isagu uu aad u jeclaa heesaha waddaniga ah, sidoo kalana waxa uu ahaa nin ka qayb qaata qaybaha kale ee fanka sida laxan sameynta“, ayey sii raacisay fanaanad Caasho-Kiin.
![Aargute](https://ichef.bbci.co.uk/ace/ws/640/cpsprodpb/e4be/live/62cca620-fe4d-11ee-aa26-a3694c640796.jpg)
![Aargute](https://ichef.bbci.co.uk/ace/ws/640/cpsprodpb/e4be/live/62cca620-fe4d-11ee-aa26-a3694c640796.jpg)
XIGASHADA SAWIRKA,CABDI GAAB ARTS
Dhinaca kale Cabdi Gaab Arts oo kamid ah bahda fanka ee Nairobi isla markaana kamid ah aartiistayaasha Soomaaliyeed kuwooda ugu sawirrada qurxoon, ayaa isna ka warramay muddadii ay wada shaqeynayeen Aargute ee uu Nairobi ku noolaa.
“Aargute waxa uu Nairobi noogu yimid qiyaastii sanadihii 2009-kii ama 2010-kii, waxa uu ahaa fannaan da’yar ee u fir-fircoon howlaha fanka, sidoo kale waxa uu lahaa qalabka muusigga si uu dadka u baahan uga haqab iro, laakiin isgu ma garaaci jirin“.
Waxa uus sheegay in shirar calami ah oo ay Soomaalidu lahaayeen isla markaana uu kamid yahay kii Embakasi uu si weyn uga dhex muuqday.
“Waxaa jiray howlo faneedyo badan oo aan si wadajir ah uga shaqeynayay, waxa aan ku xusuusan karaa deggenaan, fir-fircooni, iyo hadal gaabni“, ayuu yiri Cabdi Gaab.
Allaha u naxariistee geerida Al-fannaan Cabdiqaadir Maxamed Aadan Xuseen weli lama shaacin halka ay qoyskiisu u qorsheeyeen in lagu aaso.