Maxaad ka taqaan isbitaalka lagu daweeyo madaxweynayaasha Maraykanka iyo qaar ka mid ah kuwii la dhigay

Isbitaalka Walter Reed oo hore loogu yaqaannay Bethesda Naval Hospital wuxuu ku yaal magaalada Bethesda, Maryland. Waxaa loogu magac daray gaashaanle Walter Reed oo aad loogu xusuusto cilmi baaris u ku sameeyey sida ay kaneecadu u gudbiso xummadda hurdiga (Yellow fever).

Qaybta iminka aan ka hadlayno waxaa la dhagax dhigay 29 Juun 1939, waxaana la furay Nofembar 11 1940.

Qaybta madaxda waxaa loo yaqaan Ward 71, waana qaybta madaxweynaasha la dhigo ee isbitaalka Walter Reed medical center. Qaybtaas waxaa toos u koontaroola aqalka cad.

Qaybtaas waxa ku yaalla xafiis iyo hoolka shirarka oo madaxweynaha loogu tala galay inuu ku shaqeeyo. Waxaa kaloo ku yaalla qolka cuntada oo madaxweynuhu ku qaabili karo martida la cunataynaysa, qolka fadhiga, jikada cuntada, iyo qol isbitaal, iyo meel ay dayaaradda helikobtarka ah ku degto.

Madaxweynaha iyo ku xigeenkiisa labadaba waa lagu daweeyaa, waxaana 85kii sano ee uu furnaa lagu daweeyey madaxda maraykanka qaarkood iyo xaasaskooda. Qaar ka mid ah madaxdaas ayaa waxaa ka mid ah:

Donald Trump

Horraantii Oktoobar 2020 ayaa Mr Trump waxaa ala dhigay isbitaal;ka Walter Reed, waxaana laga daweynayey xanuunka Covid 19.

Mr Trump waxaa halkaa la geeyey isagoo lugihiisa ku socda, wax hadal ahna ma siin weriyeyaashii dibadda ku sugayey markii isbitaalka galayey.

Arrintan ayaa timid ka dib markii isaga iyo marwada 1aad Melania Trump laga helay xanuunka Covid. Muddadii dawayntu u socotay wuxuu Mr Trump toos uga soo shaqaynayey isbitaalka laakinse shaqo culus ma uusan qabanayn.

Jimmy Carter

Madaxweynihii hore ee Maraykanka ee xukunka hayey intii u dhaxaysa 1977 – 1981 ayaa isna dhowr goor la dhigay isbitaalkaas.

Carter oo bisha Oktoobar ee sannadkan ay u buuxsamayso 100 sano ayaa isbitaalka loo dhigay in lagu baxnaaniyo. Dadka aadka u xanuunsan ee da’da ah iyo kuwa dawooyinka ka daalay ayaa isbitaalka lagu siiyaa sida isbitaallada kale daryeelka loo yaqaanno Hospice care, kaasoo Jimmy Carter dhowr goor loo fidiyey.

Xanuunnada laga daweynayey waxaa ka mid ah caabuq uga dhacay kaadi-mareenka.

Ronald Reagan

Madaxweyne Reagan waxaa lagu sameeyey qalliimo uu ku gala isbitaalka Walter reed muddooyin kala duwan.

Qalliimadaas waxaa ka mid ahaa mid looga sameeyey Ganaca1985kii, mid looga sameeyey sanka 1987, iyo mid looga sameeyey farta (fargashiga) ee gacanta bidix 1989.

Markii uu isku dayga dil ka badbaaday 1981 waxay dhakhaatiirtiisu ku taliyeen in la dhigo isbitaalka Walter Reed ama Bethesda Naval Hospital.

Reagan oo ahaa madaxweynihii 40aad ee Maraykanka wuxuu geeriyooday Juun 2004 isagoo 93 jir ahaa.

BBC SOMALI