Qarax xooggan ayaa ka dhacay magaalada Muqdisho kadib saacado uun markii dowladda ay qaaday tallaabo dib loogu furay in ka badan 50 waddo oo horay loogu xiray sababo amni dartood, kuwaas oo muhiim u ah isku socodka gaadiidka iyo dadweynaha caasimada.
Qaraxa ayaa ka dhacay aagga xarunta Madaxtooyada, gaar ahaan xarunta Godka Jilacow ee hay’adda NISA, iyado qaraxyo iyo rasaas xooggan weli laga maqlayo aagga Godka Jilacow, waxaana soconaya iska hor imaad u dhexeeya ciidanka amniga iyo xubnaha AS ee weeraray halkaasi.
Weerarka ayaa ku bilowday qarax ismiidaamin ah oo lagu dhuftay bar-koontarool oo ku taalla halkaasi, kadibna waxaa xigay dagaal toos ah, sida ay innoo sheegeen dad goobjoog ah.
Ciidamo ka tirsan kuwa ammaanka ayaa sidoo kale isku geedaamay goobta la weeraray, waxaana socda gurmad deg-deg ah iyo howl-gal lagu soo afjarayo weerarka.
Weerarkan ayaa kusoo aadayo, iyadaoo maanta la furay illaa 52 waddo oo horay loogu xiray sababo amni dartood, waxaana kamid ah waddada uu haatan qaraxu ka dhacay.
Furista waddooyinka ayaa timid kadib markii ay dowladdu ku guuleysatay sugidda amniga Muqdisho oo xasilnaa bilihii lasoo dhaafay, kadib markii laga qabtay shaqo adag.