Iran iyo Mareykanka ayaa dhammeystiray wareegii labaad ee wadahadallada aan tooska ahayn ee ku saabsan barnaamijka nukliyeerka Iran, waxaana la qorsheynayaa wareeg saddexaad oo wadahadal ah toddobaadka soo socda.
Wadahadalladii maanta ayaa waxaa lagu qabtay magaalada Rome, iyadoo uu dhexdhexaadinayay Wasiirka Arrimaha Dibadda ee Cumaan, Badr al-Busaidi. Wasiirka Arrimaha Dibadda ee Iran, Abbas Araghchi, iyo wakiilka Mareykanka ee Bariga Dhexe, Steve Witkoff, ayaa kulmay muddo afar saacadood ah, waxaana kulanka lagu tilmaamay mid “wax ku ool ah”.
Araghchi ayaa sheegay in labada dhinac ay gaareen is-faham wanaagsan oo ku saabsan mabaadi’da iyo yoolalka wadahadalka, isagoo intaa ku daray in wadahadallo farsamo oo heer khubaro ah ay ka bilaaban doonaan Cumaan Arbacada, ka hor inta aan la qaban wareegga saddexaad ee wadahadalka oo la qorsheeyay 26-ka Abriil.
Wadahadalladan ayaa ujeedadoodu tahay in la gaaro heshiis cusub oo Iran looga hortagayo in ay hesho hub nukliyeer ah, iyadoo la ilaalinayo xaqa ay u leedahay horumarinta tamarta nukliyeerka ee nabadeed.
Wadahadalladan ayaa imaanaya xilli xiisado siyaasadeed iyo milatari ay ka jiraan gobolka, iyadoo Mareykanka uu ku hanjabay in uu tallaabo milatari qaadi doono haddii aan heshiis la gaarin.
Dhinaca kale, Iran ayaa wajahaysa cadaadis dhaqaale oo xooggan, iyadoo lacagta rial-ka ay hoos u dhacday, waxaana jira walaac laga qabo kororka qiimaha shidaalka iyo xaddidaadaha bulshada.
Heshiis laga gaaro wadahadalladan ayaa saameyn weyn ku yeelan kara xasilloonida gobolka iyo siyaasadda nukliyeerka ee caalamka . Radiohalgan.com