Guddoomiyaha Golaha Shacabka Baarlamaanka 11aad Jamhuuriyadda Federaalka Soomaaliya Sheekh Aadan Maxamed Nuur Madoobe ayaa sheegay in fadhiga labaad ee kalfadhiga 6aad uu u baaqday kooram la’aan.
Waxa uu Xildhibaannada maqan ugu baaqay in ay soo xaadiraan kulamada soo socda, shaqooyinka horyaalla Baarlamaanka ee kooram la’aanta u baaqday ayuu ka xusay Mooshin ay wadeen Xildhibaannada balse si rasmi ah uma faah-faahin.
Aadan Madoobe sheegay in waajibka saaran Baarlamaanka uu yahay gudashada ajandayaashii Khamiistii la gudbiyay maadaama maalintaas ay fadhiistaan xubnaha Guddiga Joogtada ah ee todobaadkii mar jaangooya kulamada saddexda cisho.
Waajibaadka saaran Xildhibaanka ayuu sheegay in ay kamid yahay ka qaybgalka kulamada Baarlamaanka mar haddii uu wakiil ka yahay dadkii soo doortay iyo Dowlad-Goboleedka uu kasoo jeedo ee metaaladda uga yahay Golaha Shacabka.
Fadhiga ugu horreeya ee Sabtida ayuu sheegay in haddii ay maqnaadaan Xildhibaannada la yeerin doonno magacyadooda si loo ogaado mudanaha xaadiray iyo kan maqan sida uu hadalka u dhigay Guddoomiye Aadan Madoobe.