Masawir muujinaya in ay wada joogaan madaxweynaha dawlad goboleedka Koonfur Galbeed, Cabdicasiis Laftagareen iyo nin kamid ah wafdi ka socday Itoobiya oo socdaal ku tagay qaar kamid ah deegaanada Soomalaida ayaa hadal hayn ka dhaliyay baraha bulshada.
Masawirka ayaynaan xaqiijin karin dhabnimadiisa.
Ninkaan hadalhaynta dhaliyay ayaa qayb ka ahaa wafdi ka socday dalka Itoobiya, gaar ahaan gobolka Oromia, kuwaas oo horay u sheegay in ay u yimaadeen dhulka Soomaalida si ay qayb uga qaataan nabadeynta gobolka Geeska Afrika.
(Lafti Nagaa) – Naaneys caan baxday oo ka timid duco ay wafdigaan Itoobiyaan ka ah horay u mariyeen ayay dad badan ugu yeerayaan ninkaan ay hadal hayntiisu ka socoto baraha bulshada.
Maxaa ka jira in ay wada kulmeen Laftagareen iyo ninkaan ka yimid Itoobiya?
Waxa aan xiriir la sameynay madaxtooyada dawlad goboleedka Koofur Galbeed si aan u xaqiijino waxa kajira in uu kulan uu dhexmaray madaxweyne laftagareen iyo mid kamid ah odayaasha dhaqanka qoomiyadda Oromada.
Afhayeenka Maamulka Koofur-Galbeed, Maxamed Cali Ibraahim, ayaa beeniyay warka sheegaya kulan dhexmaray madaxweynaha Koonfur Galbeed iyo ninkaan la socday wafdiga odayaasha ah ee ka yimid dalka Itoobiya.
Isaga oo la hadlay BBC da ayuu sawirka baahay ee la isku weydaarsanayay baraha bulshada ku tilmaamay in uu yahay mid been abuur ah.
Isha uu ka yimid sawirkaan ayaan sidoo kale ahayn mid la xqiijin karo ilaa iyo haatan.
Halkee ku sugnaa madaxweyne Laftagareen maalmihii la soo dhaafay?
Sida ay BBC da u sheegtay madaxtooyada dawlad goboleedka Koonfur Galbeed, madaxweyne Cabdicasiis Xasan Maxamed (Laftagareen) ayaa mudooyinkaan danbe ka maqnaa deeganada uu ka arimiyo maamulkiisa, iyo guud ahaan Soomaaliya.
madaxtooyada ayaa sheegtay in madaxweyne Laftagareen uu aaday dalka Sacuudi carabiya, gaar ahaan magaalada Makka, si uu ugu cumraysto dhulka barakaysan.
Intuu halkaas ku sugnaa ayay sidoo kale sheegtay madaxtooyadu in uu ka qayb galay shirkii golha wadatasiga qaran ee degdega u dhacay, kaas oo looga arrinsanayay heshiiskii ay wada saxiixdeen Itoobiya iyo Somaliland.
Intaas kadib ayay sheegeen in uu u safray waddanka Turkiga, halkaas oo uu waqti kula qaatay qoyskiisa iyo dad kale oo uu kulamo la yeeshay.
Madaxtooyada faahfaahin kama aysan bixin cidda uu la kulmay iyo waqtiga uu ku sugnaa halkaas intaba.
Madaxweynaha Lafatgareen ayaa haatan ku sugan Caasimadda dalka Kenya ee nairobi. Madaxtooyada ayaa sheegtay in uu kulamo la qaatay dad kale, balse wax ay ku adkaystay in uusan ka mid ahayn ninkaan hadal haynta dhaliyay.
Muxuu ahaa ujeedka wafdigii ka socday Itoobiya?
Dhamaadkii sanadkii tagay ee 2023 ayay ahayd markii wafdi ka socday ka socday dalka Itoobiya, gaarka ahaan gobolka Oromia oo sheegay in ay ahaayeen odayaal dhaqan ay gaareen qaar kamid ah deeganada Somaliland oo ay kamid tahay magaalada Hargeysa.
Wafdiga ayaa waxaa gudaha Somaliland ku qaabilay qaar kamid ah odayaasha dhaqanka iyo siyaasiyiin.
Hugaamiyaha odayaashaas oo mar la hadlay BBC da ayaa sheegay in ujeedkoodu uu yahay nabad ku soo dabaalista deeganada ay wada dagaan Soomalaida iyo Itoobiyaanka, iyo sidoo kale in uu nooleeyo xiriir wada dhalasho oo ka dhaxeeya qaar kamid ah beelaha Soomaalida iyo kuw aItoobiyaanka, balse nalama uusan wadaagin wax cadeyn ah oo dhaafsiisan sheegashadiis.
Balse Imaanshiyahooda ayaa hadal hayn ka dhex abuurtay Somaliland iyo sidoo kjale deegaanada kale ee Soomaalida.
Dadka qaar ayaa u arkay sheegashada wada dhalashada ee wafdigaasi in ay ahayd mid siyaasadeysan, kuwa kalana waa ay soo dhaweeyeen.