War-saxaafadeed ay soo saartay Dowladda Masar ayaa looga hadlay qoddobada ka soo baxay wada hadal ay yeesheen Wasiirka Difaaca Masar, Cabdul Majiid Saqr, iyo dhiggiisa Soomaaliya, Axmed Macallin Fiqi.
Masar ayaa sheegtay in wada hadalladan diirada lagu saarey iskaashiga milatari iyo taageeridda xasilloonida guud ahaan qaaradda Afrika.
Sidoo kale, Masar ayaa sheegtay in ay ballaarineyso taageerada Soomaaliya, iyagoo tilmaamay in ay isku arragti ka yihiin arrimaha gobolka Geeska Afrika.
Wasiirka difaaca Masar ayaa mar kale xaqiijiyay in ciidamada Masar ee qaybta ka ah Hawlgalka Taageerada Midowga Afrika ee Soomaaliya (AUSSOM) ay dhowaan imaan doonaan gudaha Soomaaliya.
Howlgalka AUSSOM ayaa beddelay Hawlgalka KMG ah ee Midowga Afrika ee Soomaaliya ATMIS, kaas oo dhammaaday sanadkii 2024.
Hawlgalkan cusub ayaa la billaambay Janaayo 2025, kaddib markii Golaha Ammaanka ee Qaramada Midoobay uu ansixiyay muddo 12 bilood ah, si dowladda Soomaaliya looga taageero dagaalka AS.
Masar iyo Soomaaliya ayaa bishii Agoosto 2024 kala saxiixday heshiis iskaashi milatari, iyagoo ku heshiiiyay in Qaahira ay ka qaybqaadato AUSSOM laga bilaabo 2025 ilaa 2029.