Dowladda Maraykanka ayaa cunaqabatayn adag dhul dhigtay 16 Shirkadood iyo Shakhsiyaad ku kala sugan Geeska Afrika, Isutagga Imaaraatka Carabta & Jasiiradda Qubrus kuwaas oo lacagaha ay uruuriyaan u gacan-geliya ‘AS’.
Wasaaradda Lacagta ee Dalka Maraykanka gaar ahaan xafiiskeeda Maamulka Hantida Dibadda ayaa go’aankaan waxa ay u qaadday in ay kahortagto taakulada dhaqaalaha ah ee ‘AS’ ka heleyso dhinacyada kala duwan sida hadalka loo dhigay.
Xukuumadda Washington ayaa ku goodisay in ay qaadayso tallaab muhiim u ah dhaqangelina cunaqabatayntaan maadaama lasoo gudbiyay xogaha shakhsiyaadkaas iyo shirkadaha si loo joojiyo dhaqdhaqaaqa ay samaynayaan.
War-saxaafadeedka kasoo baxay Wasaaradda Lacagta Maraykanka ayaa lagu sheegay in dadka ku jira Liiskaan ay kamid yihiin Ganacsato saamayn leh oo ku sugan gobolka, kuwaasi oo taageero maaliyadeed siiya ‘AS’.
Maraykanka ayaa sheegay in ‘AS’ sannadkiiba urursato in ka badan $100 milyan oo dollar oo ay ka qaaddo Ganacsatada gudaha iyo shaqsiyaad, waxaana ay u adeegsataa dagaallada ka socda geeska Afrika sida hadalka loo dhigay.
Lacagahaas marka ay gacanta ‘AS’ kusoo dhacaan waxa ay u bandhigtaa Al-Qaacida si lamid ah faracyada kale ee Ururkaas hoostagaan sida lagu yir qoraalka kasoo baxay Wasaaradda Lacagta Maraykanka gaar ahaan Xafiiskeeda Maamulka Hantida Dibadda.