Madaxweynaha Jamhuuriyadda Federaalka Soomaaliya Soomaaliya Xasan Sheekh Maxamuud ayaa Madaxtooyada Soomaaliya ku qaabilay wafdi ka socday Jaamacadda Carabta, kuwaasi oo soo gudbiyay fariin uu ka siday Xoghayaha Guud ee Ururkaasi.
Kulanka oo ka dhacay xarunta madaxtooyada ayaa intii uu socday waxaa lagu lafa guray arrimo badan oo ay ka mid ahaayeen iskaashiga u dhexeeya Soomaaliya iyo dalalka Carabta iyo u diyaar garowga shir madaxeedka dalalka Carabta oo dhawaan dhici doona.
Wadahadallada dhexmaray Madaxweyne Maxamuud iyo wafdiga Jaamacadda Carabta ayaa hoosta ka xariiqay muhiimadda ay leedahay xoojinta xiriirka iyo iskaashiga ka dhexeeya Soomaaliya iyo dalalka Carabta. Waxaa xoogga la saaray dhinacyada danta labada dhinac iyo suurtagalnimada hindiseyaal wadajir ah oo lagu horumarinayo nabadda, xasilloonida, iyo horumarka gobolka.
Si gaar ah, Madaxweyne Maxamuud ayaa uga mahad celiyay dowladaha Carabta taageerada joogtada ah ee ay la garab taagan yihiin madax banaanida iyo midnimada dhuleed ee Soomaaliya. Sida lagu yiri qoraal ka soo baxay kulanka.
Shir madaxeedka Carabta ee soo socda ayaa si weyn uga dhex muuqday doodaha, iyadoo labada dhinac ay isku dhaafsadeen arragtiyo la xiriira ajandayaasha muhiimka ah iyo natiijada ka dhalan karta. Shir-madaxeedkan waxa uu fursad u siinayaa Soomaaliya in ay dhiggeeda Carabta kala hadasho arrimaha muhiimka ah ee gobolka iyo in ay sahmiyaan dariiqooyinka loo wanaajin karo iskaashiga dhinacyada kala duwan.