Waxaa soo baxay khilaaf cusub oo u dhexeeya Madaxweynaha Maraykanka Donald Trump iyo ganacsadaha caanka ah Elon Musk.
Donald Trump ayaa ku eedeeyay Elon Musk in uu ka faa’iidaystay deeqaha dowladda ee lagu taageero shirkadaha korontada ku shaqeeya.
Wuxuu sheegay in Musk helay kaalmada ugu badan taariikhda, haddii laga jari lahaana uu shirkadihiisa xiri lahaa. Trump wuxuu xusay in dalku lacag badan badbaadin lahaa haddii la joojiyo deeqahaas, isagoo ku taliyay in guddiga DOGE ay arrintaas baaritaan ku sameeyaan.
Elon Musk oo ka jawaabay hadalka Trump wuxuu si cad u sheegay: “Ha la joojiyo dhammaan. Hadda.”
Tani waxay muujisay in Musk diyaar u yahay in la joojiyo deeqaha dowladda, taasoo ka dhigaysa mid si toos ah uga hor imaanaya hadalka Trump oo u muuqday mid ku eedeynaya Musk ku tiirsanaanta lacagahaas.
Labada nin oo saaxiibo dhow ahaa ayaa kala booday markii Musk uu ka carooday qorsheyaal dhaqaale iyo canshuuro uu so rogay Trump taasoo keentay in labada nin ay hadalo kulul iyo aflagaadi isku dhaafsadaan baraha bulshada.