Ruushka ayaa bilaabay isu diyaarinta dhoolatuska gantaallada ee meel u dhow Ukraine. Dhoolatuskaas ayaa lagu sameynayaa sida iyadoo hub nukliyeer ah la adeegsanayo.
Tallaabadan ayaa lagu sheegay in looga jawaabayo “hanjabaadaha” saraakiisha reer galbeedka.
Afhayeenka Kremlin-ka Dmitry Peskov ayaa sheegay in hadaladii u dambeeyay ee madaxweynaha Faransiiska Emmanuel Macron iyo xoghayaha arrimaha dibadda ee Britain David Cameron ay ka dhigan yihiin “gebi ahaanba isbadel cusub oo xiisad colaadeed muujinaya”.
Todobaadki hore, Mr Macron waxa uu diiday in uu meesha ka saaro suurtagalnimada in Ukraine la geeyo ciidamo Faransiis ah, haddii Kyiv ay codsato, halka David Cameron uu sheegay in Ukraine ay xaq u leedahay in ay hubka Ingiriiska u isticmaasho weerarrada ka dhaca gudaha Ruushka.
Isniintii, Wasaaradda Arrimaha Dibadda ee Ruushka ayaa sheegtay in “cadawtinimada” Cameron ay ka soo horjeedo ballanqaadkii hore ee Ingiriiska ee ahaa in gantaallada riddada dheer ee Ukraine aan loo isticmaali doonin dhulka Ruushka, taas oo macnaheedu yahay in UK ay dhinac ka tahay “colaadda”.
Wasaaraddu waxay intaa ku dartay in jawaabta laga bixinayo duqaymaha Ukraine ee loo adeegsaday hubka Ingiriiska ee Ruushka ay ku lug yeelan karto in la beegsado xarun kasta iyo qalab kasta oo Milatari oo Ingiriisku ku leeyahay dhulka Ukraine iyo meelo ka baxsan.
Waxa ay sidoo kale sheegtay in hadalka Mr Macron ee ku saabsan suurtagalnimada in ciidamo Faransiis ah loo diro Ukraine loo qaadan karo “Inay diyaar u yahay iska hor imaad toos ah oo lala galo Ruushka”.
Labada safiir ee Ingiriiska iyo Faransiiska u jooga Moscow ayaa loo yeeray Isniintii.
Dhoolatuska hubka Nukliyeerka ee taatikada ah ee lagu dhawaaqay Isniintii ayaa waxaa amray madaxweynaha Ruushka Vladimir Putin, sida ay sheegtay wakaaladda wararka ee TASS.
Waxaa la filayaa inay dhacaan “mustaqbalka dhow” waxaya ka mid ahaan doono samaynta gantaalada iyo sidoo kale ciidamada cirka iyo badda.
Hubka taatikada ah waa madaxyada nukliyeerka yar iyo hababka gaarsiinta loogu talagalay in lagu isticmaalo goobta dagaalka.
Waxaa loo qorsheeyay in ay burburiyaan bartilmaameedyada cadowga ee aag gaar ah iyaga oo aan keenin shucaac baahsan oo saameyn leh.
Dhanka kale, hubka istiraatijiyadeed ee Nukliyeerka, waa mid aad u weyn oo loogu talagalay in lagu rido meel fog – tusaale ahaan, inta u dhaxaysa qaaradaha. Ruushku waxa uu si joogta ah u sameeyaa dhoolatuska hubka nukliyeerka ee istiraatiijiga ah.
Bishii Abriil, hoggaamiyiha muddada dheer ee Belarus Alexander Lukashenko ayaa sheegay in “dhowr darsin” oo hub nukliyeer ah ay yaallo dalkiisa.
Afhayeen u hadlay sirdoonka Milateriga Ukraine ayaa ku gacan seyray ku dhawaaqista dhoolatusyada la sameyn doono.
Laakin af hayeenka Nato Faarax Dakhlallah ayaa sheegay in ay tahay tallaabadaas “khatar iyo mas’uuliyad darro” wuxuuna caddeeyay in Nato ay sii wadeyso “feejignaanta”.
Ka dib kulan ay Paris kula yeesheen Mr Macron iyo Madaxweynaha Shiinaha Xi Jinping, madaxa guddiga Yurub Ursula von der Leyen ayaa sheegtay in ay rajaynayso in madaxweyne Xi uu gacan ka geysto sidii uu u dejin lahaa hanjabaadaha “mas’uuliyadda darrada” ee Ruushka.
Hanjabaadaha Ruushka ayaa ku ku soo beegmaya iyadoo madaxweyne Vladimir Putin loo caleema- saaray madaxweynenimada markii shanaad.
Wasaaradda arrimaha dibadda ee Ukraine ayaa sheegtay in aysan dib dambe u tixgelin doonin Vladimir Putin inuu yahay madaxweyne sharci ah kadib caleema saarkiisa, waxayna ku boorisay dalalka kale iyo ururada caalamiga ah inay ku daydaan.
Si kastaba ha ahaatee, ilo diblumaasiyadeed oo Faransiis ah oo ay soo xigatay wakaaladda wararka ee Reuters ayaa sheegay in danjiraha Faransiisku uu ka qaybgeli doono xafladda.
Jarmalka iyo dhowr waddan oo kale oo Yurub ka mid ah ayaa meesha ka saaray inay soo diraan ergadooda.