Madaxweynaha Somaliland, Mudane Cabdiraxmaan Maxamed Cabdillaahi (Cirro), ayaa maanta khudbad ka jeediyay Baarlamaanka dalka Kenya, taasoo noqotay tallaabo kale oo muhiim ah oo Somaliland uga gol leedahay xoojinta xiriirka diblumaasiyadeed ee ay la leedahay Dalka Kenya.
Guddoomiyaha Baarlamaanka Kenya, Moses Wetang’ula, ayaa si diirran u soo dhaweeyay Madaxweynaha iyo wafdigiisa, isagoo muujiyay sida dowladda Kenya ay u danaynayso wada-shaqayn iyo xiriir dhow oo lala yeesho Somaliland, iyadoo laga duulayo danaha dhaqaale, ammaanka iyo is-weydaarsiga aqoonta iyo khibradaha.
Madaxweyne Cirro ayaa khudbadiisa ku bogaadiyay xiriirka taariikhiga ah ee u dhaxeeya labada shacab ee walaalaha ah, isagoo xusay sida ay muhiim u tahay in hay’adaha labada dhinac ay yeeshaan iskaashi waara oo ku saleysan is-dhaafsiga khibradaha, tababarrada iyo kor u qaadista xiriirka ganacsi iyo siyaasadeed.
Madaxweyne Cirro ayaa lagu wadaa inuu habeen dambe kulan gaar ah la yeesho jaaliyadda Somaliland ee ku dhaqan dalka Kenya. Kulankaas ayaa lagu lafa-guri doonaa waxyaabaha u qabsoomay Xukuumada Madaxweyne Cirro tan iyo doorashadiisa, sidoo kale waxa la falanqeyn doonaa jihada siyaasadeed iyo horumarineed ee Somaliland ku socoto.