Madaxweynahii hore ee dalka oo si adag uga hadlay xarig maanta Muqdisho loogu geystay ilaa 8 Wariye
Madaxweynihii hore ee Soomaaliya Shariif Sheekh Axmed oo maanta shir jaraa’id ku qabtay magaalada Muqdisho ayaa si kulul uga hadlay xaaladda amni iyo cadaadiska saxaafadda ee la xariira caburinta xorriyadda hadalka ee ka jirta Muqdisho.
Shariif Sheekh Axmed ayaa cambaareeyay xarig maanta Muqdisho ugu geysatay dowladda Fedaraalka ilaa sideed Wariye, isagoo talaabadaasi ku tilmaamay ficilo lid ku ah dimuqraadiyadda iyo dowladnimada Soomaaliya.
“Xorriyadda hadalka iyo madaxbannaanida saxaafadda waa tiir muhiim ah oo dowlad kasta ay ku dhisan tahay. Marna la aqbali maayo in saxafiyiin la caburiyo ama la handado sababo siyaasadeed dartood,” ayuu yiri Shariif Sheekh Axmed.
Madaxweynihii hore ayaa sidoo kale xusqy in madaxda dowladdu ay sheegayaan in dalka ka qabanayaan doorasho qof iyo cod ah hadana ay geysanayaan tacadiyo toos ah, wuxuuna ugu baaqay madaxda dowladda iney ilaaliyaan xuquuqda Saxafiyiinta ayna joojiyaan fara gelinta warbaahinta madaxa banaan ku hayaan.
“Waxaan cambaaraynayaa tacadiyada iyo caburinta ka dhanka ah suxufiyiinta iyo warbaahinta xorta ah waxaana nasiib darro ah in nidaamka maanta jira oo sheeganaya inuu rabo doorasho qof iyo cod ah uusan aqbali karin in weriyeyaashu ay soo gudbiyaan dareenka iyo aragtida shacabka. Falalkaasi waa kuwa ka soo horjeeda dowladnimada iyo dastuurka” ayuu yiri Shariif Sheekh Axmed.
Shirkaan jaraa’id ee Shariif Sheekh Axmed ayaa kusoo aadaya, iyadoo warbaahinta madaxa banaan ay wajahayaan cadaadis isa soo taraya oo lagu hayo qaar ka mid ah wariyeyaasha si gaar ah uga warama arrimaha siyaasadda iyo amniga ee dalka.