Madaxweynaha Jamhuuriyadda Federaalka Soomaaliya Xasan Sheekh Maxamuud ayaa maanta kormeer ku tagay markabka Oruc Reis oo ku howlanaa baarista shidaalka badda Soomaaliya.
Markabka Oruc Reis ayaa si rasmi ah u soo gabagabeeyay sahanka shidaalkaa xeebaha Soomaaliya oo uu soo bilaabay 25-kii Oktoobar 2024.
Madaxweynaha ayaa ku bogaadiyay howl-wadeenada iyo bahda iskaashiga Turkiga dadaalladooda ku aaddan sahanka shidaalkaa xeebaha Soomaaliya, isaga oo muujiyey in natiijada baaristan ay wax weyn ka beddelayso xaaladda Soomaaliya iyo xiriirka iskaashi ee Labada dal.
“Tani waa guul muhiim ah oo xoojinaysa yoolkeenna ah in Soomaaliya ay si buuxda uga faa’iideysato kheyraadkeeda, una beddesho fursado dhaqaale iyo horumar bulsho,” sida uu yiri Madaxweyne Xasan Sheekh.
Sidoo kale Madaxwayne Xasan ayaa sheegay in Dowladda iyo shacabka Turkiga mar walba ay hormuud u yihiin tallaabooyinka muujinaya in Soomaaliya la maalgashan karo.
Markabka Oruç Reis ayaa la filayaa inuu ka baxo dekadda Muqdisho 15-ka Juun 2025, isagoo ku laabanaya dalka Turkiga.