- Maamulka Mandheera oo cadeeyay in dowladda Kenya ay taageero u fidisay ciidanka Jubbaland
Guddoomiyaha Mandhera, Maxamed Aadan Khalif, ayaa ku baaqay in si dhaqso ah looga saaro ciidamada Jubbaland ee lagu eedeeyay inay ka hawlgalaan gudaha degmada Mandhera, isagoo sheegay in joogitaankoodu khatar ku yahay madax-bannaanida Kenya, isla markaana shacabka ay qaadi karaan tallaabo haddii dowladda aysan soo faragelin.
Khalif oo Jimcihii ka hadlay munaasabad dadweyne ayaa sheegay in ciidamada Jubbaland ay xero ka sameysteen dugsiga hoose ee BP1 Primary School oo ku yaalla Mandhera, taas oo keentay in la xiro dugsiga, ardayduna ay ku barakacaan, iyagoo diyaar garoobayay imtixaannada qaran.
“Mandhera lama dhigi karo goob dagaal oo Soomaaliya loogu tartamayo. Dan naga ma gasho Soomaaliya marka laga reebo nabad. Haddii ciidamadaan si degdeg ah loo saarin, tallaabo ayaan annagu qaadi doonnaa,” ayuu yiri guddoomiyuhu.
Wuxuu ku eedeeyay ciidamada Kenya Defence Forces (KDF) inay taageerayaan cutubyada Jubbaland, isagoo ku baaqay in Wasiirka Gaashaandhigga Kenya, Roselinda Tuya, ay arrintan soo farageliso. Sidoo kale, wuxuu digniin u diray Itoobiya, isagoo ka dalbaday inaysan Mandhera uga dhigan saldhig hawlgallo ay la xiriiraan Soomaaliya.
“Ma suurtoobayso in dugsiyo, beeraha iyo ceelasha biyaha la xiro iyadoo lagu marmarsiyoonayo taageeridda koox ka tirsan Soomaaliya. Waxaan sidoo kale u sheegaynaa deriskeenna Itoobiya inaysan Mandhera ka dhiganin saldhig. Xuduud kale oo badan ayaa jira,” ayuu raaciyay.
Xildhibaanada kale ee gobolka ayaa taageeray hadalka guddoomiyaha. Haweeneyda ku metesha Mandhera Baarlamaanka, Umulkheir Kassim, ayaa cambaareysay in dugsi loo beddelo waxa ay ku tilmaantay “xero maleeshiyo,” iyadoo sheegtay in arrintani cabsi iyo barakac ku abuurtay haweenka iyo carruurta.
Senator Cali Roba ayaa isna qoraal uu ku daabacay X (Twitter) ku sheegay in “cabsi iyo walaac ku dhacay shacabka Mandhera kadib markii rasaas iyo gantaallo ay ku dhaceen gudaha dhulkooda. Tani ma ahan nolol muwaadiniin Kenyan ah loogu talagalay.”
Hase yeeshee, Madaxweyne ku xigeenka Jubbaland, Maxamuud Sayid Aadan, ayaa horraantii bishan beeniyay eedeymaha, isagoo ku adkeystay in ciidamadoodu ku kooban yihiin dhulka xuduudka Soomaaliya ee Kenya la wadaagto.
Ciidanka Jubbaland, oo loo yaqaan Darawiish, waa cududda amniga ee maamulka Jubbaland oo xaruntoodu tahay Kismaayo. Waxaa laga dhisay dhaqdhaqaaqii Ras Kambooni ee uu hoggaaminayay Axmed Madoobe, waxaana loo adeegsaday dagaalka ka dhanka ah al-Shabaab iyo difaaca maamul-goboleedka Jubbaland.
Inkasta oo Kenya ay muddo dheer u adeegsatay Jubbaland sidii “xayndaab” ka dhan ah al-Shabaab, haddana siyaasaddan ayaa muran iyo dhaliil gudaha Kenya ka dhaliyay, iyadoo khubaradu ka digayaan in Mandhera lagu jiido khilaafaadka gudaha Soomaaliya, taas oo dhaawici karta madax-bannaanida Kenya iyo badbaadada shacabka ku nool xuduudka ay ku kulmaan Kenya, Soomaaliya iyo Itoobiya.