Kooxda kubadda cagta Liverpool ayaa iska xaadirisay wareegga shanaad ee tartanka FA Cup oo ay iskugu soo hadhayaan 16 kooxood oo isku-aadkooda la samayn doono goordhow, waxaana Reds ay 5-2 ku karbaashtay Norwich oo xammili weyday cadaadis badan oo ay xiddigaha Reds ku saareen Anfield.
Shan gool oo ay kala qaybsadeen shan ciyaartoy ayaa Liverpool u diray wareegga shanaad ee FA Cup, sidoo kalena Jurgen Klopp oo ay u ahayd ciyaartiisii koowaad ee tan iyo intii uu shaaciyey inuu ka tegayo naadigan ay dheelaan, ayaa si weyn ugu dabbaal-degay guushan oo u xaqiijisay inay ku tartamayaan dhamaan afartii koob ee ay loollankooda soo bilaabeen bilowgii xilli-ciyaareedka.
Curtis Jones ayaa noqday aftax wanaagsan oo madax ku dhaliyey goolka koowaad ee Liverpool daqiiqaddii 16aad ee qaybta hore, laakiin kooxda martida ee heerka labaad ee Norwich ayaa lix daqiiqadood kaddib keentay goolka barbarraha oo uu madax ugu saxeexay Ben Gibson oo kubbad koorne ahayd la kulmay.
Liverpool oo inta badan maamulaysay ciyaarta ayaa waxa hoggaanka usii dheereeyey Darwin Nunez daqiiqaddii 28aad, markaas oo uu xerada ganaaxa ka helay kubbad uu si xarrago leh uga soo shaqeeyey da’yarka bandhigga heerka sare ah sameeyey ee Conor Bradley, waxaana qaybta hore lagu kala nastay natiijo 2-1 ah oo ay hoggaanka ku hayso Liverpool.
Ciyaartan oo Liverpool ay usoo laabteen Andy Robertson, Dominik Szoboszlai iyo Alexander-Arnold oo kasoo kabtay dhaawac ay muddo u jiifeen, ayaa waxa uu Jurgen Klopp kusoo bilaabay ciyaartooyo da’yar u badan oo uu nasiyey xiddigihiisa waaweyn inta badan.
Daqiiqaddii 53aad ayay Liverpool hoggaanka kusii dheeraysatay gool qurux badan oo uu u saxeexay Diogo Jota oo noqday saaxiibka shabaqa tan iyo markii uu kasoo kabtay dhaawac uu muddo u jiifay, halka Vigil van Dijk oo beddel kusoo galay uu goolka afraad madax ku dhaliyey markii uu la kulmay kubbad koorne ahayd oo uu soo qaaday Szoboszlai oo isaguna beddel kusoo galay.
Norwich ayaa u muuqatay inay dib usoo laabanayso, waxaanay dhalisay laba gool oo degdeg ahaa oo midkood laga diiday markii lagu xaqiijiyey inay offside ku jireen.
Ryan Gravenberch oo khadka dhexe ka dheelayey ayaa daqiiqaddii ugu dambaysay waqtigii dheeraadka ahaa ee ciyaarta lagu daray, waxa uu madax ku dhaliyey goolka shanaad ee Liverpool oo ahaa kubbad uu darbad xooggan dhulka ku dhuftay Conor Bradley oo uu madax la haleelay laacibka reer Netherlands.
Liverpool ayaa sidaas ugu soo gudubtay wareegga shanaad ee FA Cup ama wareegga 16ka, waxaanay hadda sugayaan nasiibkooda kooxda ay ku dhici doonaan isku-aadka la samaynayo.