Nin 62 jir ah ayaa la sheegay in uu si degdeg ah u soo kabanayo ka dib markii loo galiyey kelyaha doofaarka, waxaana dhawaan laga saari doonaa isbitaalka.
Kelyaha doofaarka ee lagu beeray jidhka bini’aadamka ayaa isbaddel lagu sameeyay hidde sidahooda sababtoo ah haddii kale jidhka bini’aadamku wuu diidi lahaa in uu aqbalo.
Dhakhaatiirta Mareykanka ayaa sheegay in Rick Slimane uu yahay geesi dhab ah oo qaliinkan ku guuleystay.
Ugu dambeyntii, waxaa la sheegay in xubnaha xayawaanka la isticmaali karo ka dib isbeddel yar oo hidde-side ah si loogu tallaalo ruux bini-aadmi ah.
Kelyaha Doofaarka ayaa si tijaabo ah loogu isticmaalay dadka lagu sheegay in ay maskaxdu dhimatay.
Isbitaalka guud ee Massachusetts ayaa bayaan uu soo saaray ku sheegay in qalliinka afarta saacadood qaatay, oo la sameeyay 16-kii bishan Maarso, uu ahaa guul weyn oo laga gaaray dadaallada lagu doonayo in bukaannada la siiyo xubno diyaar ah.
Waxa uu hore 2018 isla cusbitaalka lagaga bedelay kelyaha ka dib markii uu ku jiray kelyo sifaynta muddo 7 sano ah maadaama kelyihiisa aanay si fiican u shaqaynayn.
Shan sano ka dib, ku-tallaaliddii wuu guuldarreystay oo wuxuu ku qasbanaaday inuu dib ugu laabto sifeynta bishii May ee sannadkii tagay.
XIGASHADA SAWIRKA,MASSACHUSETTS GENERAL HOSPITAL
Dhakhaatiirtiisa ayaa ku micneeyay in uu la kulmay dhibaatooyin ka yimid sifeynta joogtada ah, taas oo u baahan in uu sameeyo wareegyo isbitaal labadii toddobaadba mar si looga hortago xinjirowga dhiigga iyo in la xakameeyo arrimaha kale, taas oo saamayn ku yeelatay noloshiisha caadiga ah.
Saleebaan waxa uu sheegay in uu ka fikiray faa’iidada iyo khasaaraha ay leedahay in kelyaha la beddelo balse uu u arkay in aanay faa’iido u lahayn isaga oo keliya balse ay tahay iftiin rajo u ah kumannaan qof oo u baahan kelli si ay u noolaadaan. Baahida kelyaha ayaa badan balse lama hayo dad ku deeqa.
Waxaa jira gabaabsi joogto ah oo ku aaddan xubnaha deeq bixiyayaasha aadanaha ee kuwa u baahan. Si kastaba ha ahaatee, xayawaanku waxay ka caawin karaan aadanaha in ay ka maarmaan arrintan ku-deeqidda.
Kelyaha doofaarka waxaa Cambridge, Massachusetts ugu deeqay EGenesis. Waxyaalaha hidde-sidaha ee waxyeelada u keeni lahaa jidhka bini’aadamka ayaa laga soo saaray kelyaha doofaarka, waxaana lagu bedelay kuwo shaqayn kara oo gacan ka geysta badbaadinta nolosha aadanaha.
Saleebaan wali waxa uu qaadanayaa dawooyinka ka hortagga diidmada ee jirka mana cadda ilaa inta kellidiisa cusubi shaqayn doonto.
Dr. Tatsuo Kawai, oo xubin ka ah kooxda ku-tallaalidda, ayaa yiri, “Waxaan rajeyneynaa in habkan ku-tallaalidda uu siin karo fursad cusub oo nolosha malaayiin bukaanno ah adduunka oo dhan kuwaas oo u dhimanaya kelyaha.
XIGASHADA SAWIRKA,UNIVERSITY OF MARYLAND SCHOOL OF MEDICINE
Nin u dhashay dalka Mareykanka ayaa sanadkii 2022 noqday qofkii ugu horreeyay adduunka ee lagu tallaalay wadne uu leeyahay xayawaanka doofaarka oo isbaddal dhinaca hiddaha ah lagu sameeyay.
David Bennett, oo 57 jir ahaa xilligaas ayay xaaladdiisu wanaagsaneyd, saddex maalmood kaddib markii lagu sameeyay qalliinka tijaabada ah oo qaatay toddobo saacadood, sida ay dhakhaatiirtu sheegeen.
Ninkan ayaa qalliinka loogu sameeyay isbitaal ku yaalla magaalada Baltimore ee dalka Mareykanka.
David Bennett ayaase geeriyooday bishii March ee isla sanadkaas.
Mr Bunnet oo qabay xanuun dhanka wadnaha ayaa noolaa labo bilood kadib markii uu maray qalliinkii wadnaha doofaarka.
Bennet ayaa ka warqabay halista ka dhalan karta qalliinka, isaga oo qalliinkaas ku sheegay ‘Ul mugdi lagu tuurey’.
Dhaqaatiirta jaamacadda Marryland ee Maraykanka ayaa la siiyay ogolaansho gaar ah oo ku saabsan in ay qalliinka fuliyaan, iyada oo wakaaladda Kormeerka Caafimaadka Maraykanka ay go’aankani u cuskatay maaddaama Mr David uu markasta dhiman lahaa, xitaa haddii aanan qalliinka lagu samaynin.