Jamie Carragher ayaa u saadaaliyay Real Madrid inay ku guuleysato Champions League xilli ciyaareedkan, xitaa haddii ay la kulmaan guuldarooyin kale oo naxdin leh kulamada soo socda.
Real waa kooxda ugu guulaha badan taariikhda tartanka, iyagoo ku guuleystay 15 koob, waana kooxda difaacaneysa xilli ciyaareedkan.
Waxa ay kor u qaadeen koobka lix ka mid ah 11-kii sano ee la soo dhaafay waxana ay mar walba wacdaro ka dhigaan tartanka ugu xiisaha badan kooxaha.
Qaabka cusub ee Champions League, kaas oo ay ka qayb galayaan 36 kooxood ayay koox walba ciyaaraysaa 8 kooxood waxana lagu tartami doonaa kala saraynta iyada oo 8-da kooxood ee ugu sareeya u gudbi doonaan wareega xiga.
Real ayaa hadda fadhisa kaalinta 12-aad kadib markii ay badisay laba kulan midna laga badiyay 3-dii kulan ee ugu horeeyay sidaas darteed waxa ay ka baxsan yihiin 8-da kooxood ee ugu sareeya kuwaas oo si toos ah ugu soo bixi doona wareega 16-ka
Kooxda Carlo Ancelotti ayaa guuldarro lama filaan ah kala kulantay Lille bishii hore 1-0, waxayna hadda wajahayaan kulamo adag oo ay ku wajahayaan AC Milan, Liverpool iyo kooxda heysata Europa League ee Atalanta.
Si kastaba ha ahaatee, Carragher ayaa qaba in ka dib markii ay 5-2 ku burburiyeen kooxdii finalka ku soo baxday ee Borussia Dortmund kulankoodii ugu dambeeyay, ay Real ku soo noolaan doonto wareega 16ka isla markaana ay difaacan doonto koobkeeda finalka bisha May.
“Waad ogtahay waxa ay Real Madrid ku samayn doonto qaabkan cusub ee Champions League, waxa ay wareegaas isreeb-reebka ku gali doonaan si dirqi ah, ka dibna waxa ay ku dambayn doonaan in ay ku wada guulaystaan koobka”.