Wasiirka Arrimaha Dibadda Itoobiya, Gedion Timothewos, ayaa si rasmi ah u qirtay in dowladda Eritrea ay la wareegtay, welina ay gacanta ku hayso, dhul ka tirsan Jamhuuriyadda Dimuqraadiga Federaalka Itoobiya.
Wasiirka ayaa sheegay in Eritrea aysan ku ekeyn qabsashada dhulkaasi, balse ay sidoo kale taageerto kooxaha fallaagada ah ee ka dagaallama gudaha Itoobiya, kuwaas oo ka soo horjeeda dowladda federaalka.
Gedion Timothewos wuxuu xusay in dhaqdhaqaaqyada ciidamada Eritrea ee ka socda gudaha dhulka Itoobiya, iyo xiriirka ay la leeyihiin kooxaha hubeysan, ay yihiin gardarro cad oo lagu soo qaaday madax-bannaanida iyo midnimada dhuleed ee dalka Itoobiya.
Si kastaba ha ahaatee, Wasiirka Arrimaha Dibadda Itoobiya ayaa tilmaamay in dowladdiisu ay weli u furan tahay wadahadallo dhammaystiran oo lala galo Eritrea, si xal waara loogu helo khilaafaadka taagan. Wuxuu sheegay in wadahadalladaasi ay ku jiri karaan arrimo muhiim ah, oo ay ka mid tahay helitaanka marin badeed iyo arrimaha amniga xuduudaha.
Hadalka kasoo yeeray Addis Ababa ayaa imaanaya xilli uu sii xoogeysanayo walaaca laga qabo xiriirka labada dal, iyadoo beesha caalamkuna ay si dhow ula socoto xaaladda u dhexeysa Itoobiya iyo Eritrea.