Buuloburte(radiohalgan.com)-29 Luulyo 2025:
Iska horimaad kooban ayaa maanta ka dhacay bartamaha degmada Buuloburte ee gobolka Hiiraan, kaasoo la sheegay inuu u dhexeeyay ciidamo ka tirsan dowladda Soomaaliya. Shaqaaqadan ayaa sababtay dhaawaca laba qof oo ka mid ahaa dhinacyadii iska hor yimid.
Goob-joogayaal ayaa sheegay in iska horimaadka uu yimid kadib muran kooban oo soo kala dhexgalay ciidamo ku sugan degmada, balse waxaa si degdeg ah faragelin ugu sameeyay saraakiisha ammaanka si loo joojiyo xaaladda.
Wararka hordhaca ah ayaa tilmaamaya in dhaawacyada aysan halis ahayn, iyadoo la sheegay in labada askari hadda lagu dabiibayo xarun caafimaad oo ku taalla degmada.
Laamaha ammaanka ee degmada Buuloburte ayaa bilaabay baaritaanno ku saabsan sababta keentay isku dhaca, waxaana la filayaa in faahfaahin dheeraad ah laga bixiyo saacadaha soo socda.