Ugu yaraan 104 qof ayaa ku dhintay tobanaan kalena waa ay ku dhaawacmeen ka dib markii daadad xooggan ay ku dhufteen tuulada Kasaba oo ku taal xeebta harada Tanganyika ee bariga Jamhuuriyadda Dimuqraadiga ah ee Kongo, sida ay sheegeen mas’uuliyiin maxalli ah iyo dad u dhaqdhaqaaqa bulshada rayidka ah Sabtidii.
Sammy Kalodji, oo ah maamulaha dhulka Fizi ee gobolka Koonfurta Kivu, ayaa sheegay in wararka ay muujinayaan in ka badan 100 dhimasho ah ilaa hadda. Bernard Akeli, oo ah madaxweynaha dhulka Nganga, ayaa xaqiijiyay in daadadku ay dhaceen habeenkii Khamiista ilaa Jimcaha iyadoo dadka deegaanka ay hurdayeen, ka dib roobab mahiigaan ah iyo dabeylo xooggan ayaa sababay in wabiga Kasaba uu buux dhaafo.
Waxa uu xusay in biyihii wabiga ay qulqulayeen iyaga oo wata dhagxaan waaweyn, geedo, iyo dhiiqo qaro weyn, waxayna la tageen guryihii ku yaallay harada qarkeeda.
Wuxuu intaas ku daray in dadka dhintay ay u badnaayeen carruur iyo dad waayeel ah, isagoo sheegay in 28 qof ay ku dhaawacmeen, ugu yaraan 150 gurina ay burbureen.
Mid ka mid ah dadka u dhaqdhaqaaqa bulshada rayidka ah ayaa sheegay in 119 mayd la helay fiidnimadii Sabtida, isaga oo sheegay in dhimashadu ay kor u kacdo iyada oo hawlgallada baaritaannada ay ka socdaan meel ay adag tahay in la gaaro.