Xilli ciyaareed cusub ayaa u bilaabanaya horyaalka Engiriiska ee ah kan loogu daawashada badanyahay horyaalada Yurub, su’aalaha bilowgiisa lays-waydiinayana waa isla inta sanad walba lagu ibo-furo, oo ah yaa ku guulaysan kara?, maxaa ku cusub sharciyada?, yaa cusub?, maxaa is beddelay? kuwii joogay ee tababarayaal ahaa, kuwa yimi iyo ciyaaryahano intaba.
Waa Sunne kubadeed in sanad walba oo cusub uu wato wax cusub oo wax wayn beddeli kara, lakiin horyaalka Engiriiska marna waxa uusan lumin tamarta xifaalo ee dhex taala kooxaha waawayn ee ay ka midka yihiin Manchester City, Man United, Liverpool, Chelsea, Arsenal, Tottenham iyo kooxaha kale.
Khubarada BBC-da ee saadaasha ka sameeyey horyaalka xilli ciyaareedkan, wali filashada ayaa ah mid dul hoganaysa Manchester City, iyadoo laga tusaale qaadanayo wacdarihii afartii xilli ciyaareed ee ugu danbeeyeey
Balse waxaa wali jira kooxo muujinaya dadaal ah inay ka hor istaagi karaan Man City inay xiriiriso markeedii shanaad kal ciyaareedkan cusub ku guulaysiga horyaalka.
Maxamed Axmed Deysane, oo ah falanqeeye ciyaaraha ayaa aaminsan in wali City tahay kooxda haysata fursadaha ugu badan ee ku guulaysiga horyaalka xilli ciyaareedkan cusub.
“Marka eelo eego sidii markhaatiga ugu ahayn afartii hore ee xiriirka ahayd ee ay ku guulaysteen City, wali waxay u muuqataa in city kooxda haysata fursad markii shanaad laakiin waxkasta waa dhici kara” ayuu yiri Deysane
Waxaa kale oo intaa ku daray in haddii kooxda Arsenal oo tartanka ku xigta City, ay keensato dhaliye weyn oo dhalin kara goolal afar ilaa soddon ay suuragal tahay inay Arsenal guul gaari kaaran.
Xigashada Sawirka,Ciise Talyaani
Ciise Maxamuud CIise, oo ku caana Talyaani, waa wariye ciyaaraha ku xeeldheer, qudhiisa wuxuu qabaa in kooxda macallin Pep Guardiola, ay yihiin filasha sare balse tartanku wali uu dhexyaalo kooxaha oo qaarkood isbaddelo sameyey.
“Man City weli waa kooxda koowaad ee la fili karo, lakiin rag ayey wax kala dhaxeeyaan, waxaan isleeyahay tartan adag ayey kala kulmaysaa markan Arsenal, Liverpool, United, Chelsea iyo Tottenham oo dhammaantoodba is-bedelo xoog leh sameeyey. Waa laga yabaa marka Arsenal laga yimaado in kooxaha kale is-beddeladu ay saamayn ku yeeshaan, lakiin Arsenal doorkan waa tartame dhab ah”ayuu yiri Ciise Talyaani.
Maxaa cusub sanadkan?
1. Tababarayaasha
Afar meelood tababarayaasha ka qayb-galaya doorkan way cusubyihiin, micnaha 5-kamida 20-ka tababare ee doorkan waa kuwa cusub, waxaa u horreeya, tababaraha Liverpool Arne Slot, Enzo Maresca oo jooga Chelsea, Russell Martin oo laylinaya Southampton, Kieran McKenna oo ah tababaraha Ipswich iyo Fabian Hurzeler isna hogaaminaya Brighton.
Slot iyo Hurzeler, waxay ka kala yimaadeen Feyenoord iyo St Pauli, halka Martin, McKenna iyo Maresca – oo watay Leicester City, raggan dhammaantood waxa ka soo baxeen, hogaaminta horyaalka heerka labaad ee Championship xilli ciyaareedkii hore.
2. Ciyaaryahanada
Manchester United waxa ay kula soo saxiixatay £52 milyan oo ginni daafaca Lille Leny Yoro, sidoo kale waxa ay £33.7 milyan oo ginni kula soo wareegtay weeraryahanka Bologna Joshua Zirkzee, waxana ay Bayern Munich ka soo qaadatay difaacyada kala ah Matthijs de Ligt iyo Noussair Mazraoui oo isku dar ay ku heshay lacag gaaraysa £60 milyan ooginni.
Kooxda heysata horyaalka Manchester City waxa ay Savinho, kaga soo iibsatay kooxda ay Troyes £30.8 milyan oo ginni, halka Arsenal ay soo iibsatay daafaca Bologna Riccardo Calafiori £42m.
Brighton waxa ay Newcastle United ka soo qaadatay garabka Gambia Yankuba Minteh iyo laba ciyaaryahan oo khadka dhexe ah oo £25 milyan oo ginni ugu kacay kuwaas oo kala ah, Mats Wieffer oo ay kala soo wareegeen Feyenoord iyo Brajan Gruda oo ka yimid Mainz.
Chelsea waxa ay iyaduna la soo saxiixatay ciyaartoy badan oo ay ku jiraan weeraryahanka Barcelona Marc Guiu iyo goolhayaha £20.7 milyan ee ginni ugu fadhiya Filip Jorgensen oo ay kala soo wareegeen Villarreal. Goolhayahan cusubi waxa uu booska koowaad kula tartami doona Robert Sanchez.
Archie Gray, waxa uu isna ka mid yahay ciyaaryahannada kal ciyaareedkan ku cusub Premier League waxa uu kusoo biiray Tottenham Hotspur isaga oo kaga yimid Leeds United lacag gaaraysa £30 milyan oo ginni.
Kooxda uu hogaamiyo Julen Lopetegui, ee West Ham waxa ay ku bixisay £27 milyan oo ginni weeraryahanka reer Germany Fullkrug oo ay kala soo wareegeen finalka Borussia Dortmund, waxayna £25.5 milyan ginni oo ay ku soo iibsadeen garabka reer Brazil Luis Guilherme oo ka yimid kooxda Palmeiras.
3. Kooxaha
Sanadkan waxaa dib usoo noqday kooxda Leicester City oo horreyugu guulaystay horyaalka 2016-kii, kuna soo guulaysatay sanadkii tagay horyaalka heerka labaad. Waxaa iyaguna muddo ka dib usoo noqday Southampton oo ka soo wacdareysay horyaalka heerka labaad, waxana ay guuldaro la’aan ahaayeen sanadkii tagay intii udhaxaysay September ilaa February, micnaha 25-kulan.
Kooxda saddexaad ee sanadkan ku cusub horyaalka kowaad waa kooxda Ipswich Town oo saaxadan ka maqnayd 22-sano, waxa ay kusoo baxeen qaab awwoodeed lakiin lama qiyaasi karo sida ay noqon doonaan dhammaadka xili ciyaareedkan.
Saadaasha Premier League 2024-25: Khabiirada isboortiga ee BBC ayaa soo xushay 4-ta ugu sare
Xigashada Sawirka,Getty Images
Manchester City waxa ay ku raaxaysanaysaa wakhti aan hore loo arag oo maamul, laakiin intee ayay soconaysaa?
Kooxda Pep Guardiola, ayaa horey u noqotay kooxdii ugu horeysay ee 136 sano jirsatay horyaalka Ingariiska ee loo caleemo saaro horyaalka heerka koowaad afar sano oo xiriir ah, iyadoo haatan bartilmaameedka City uu yahay inay rikoorkaas gaarsiiso shan xiriir ah.
Caqabadda qof kasta oo kale waa in la joojiyo iyaga. Arsenal ayaa tartanka horyaalka Premier League u qaaday maalintii ugu dambaysay ee bishii May, laakiin ma qaadi karaan tillaabada xigta markan, yaase ku guulaysan kara?
Waxaan weydiinay 29 khabiir oo BBC TV iyo raadiyaha ah inay doortaan afarta sare, iyadoo sharraxaad laga bixinayo doorashadooda.
Saadaashan ayaa lagu saleeyay sida koox walba ay u qaabaysan tahay Khamiista, 15ka Agoosto, iyadoo in ka badan laba toddobaad ay ka harsan tahay ilaa inta uu suuqa kala iibsiga ciyaartoyda xirmayo 30ka Agoosto.
Sagaal kooxood ayaa kasoo muuqday afarta sare ee la saadaaliyay, laakiin kaliya Manchester City iyo Arsenal ayaa kasoo muuqday 29-ka kooxood ee ugu sareysa.
Horyaalka oo caawa furmi doona waxaa weli la isku raacsan yahay in Manchaster City tahay awwood aan la dhayalsan karin oo doonaysa inay sii dheeraysato rikoorkeeda iyadoo filaysa inay hesho horyaala markii shanaad oo xiriirk ah.
Arsenal oo labadii xili ciyaareed ee la soo dhaafay u muuqatay kooxda kaliya ee ka ridan karta horyaalka City, ayaa iyaduna door bidaysa xilli ciyaareedkan inaysan waxba la harin oo ay si walba ku hanato horyaalka.
Labada macallin ee layliya labada kooxood oo Spanish ah, waa Pep Guardiola iyo Arteta, ayaa doonaya inay masraxa ku muujin doonnaan awwoodooda iyo tayadooda macallinimo.