Wasiirka Arrimaha Gudaha Hirshabelle oo daahfuray ololaha wacyigelinta dhismaha goleyaasha deegaanka Degmada Buulobarde,
Wasiirka Wasaaradda Arrimaha Gudaha iyo Dowladaha Hoose ee Dowladda Hirshabelle, Mudane Cabdiraxmaan Daahir Guure (Karoore), ayaa maanta si rasmi ah uga daahfuray degmada Buulobarde ee gobolka Hiiraan olole wacyigelin ah oo ku saabsan dhismaha goleyaasha deegaanka.
Munaasabadda daahfurka waxaa ka qeybgalay qeybaha kala duwan ee bulshada degmada Buulobarde, oo ay ka mid yihiin odayaasha dhaqanka, dhalinyarada, haweenka iyo masuuliyiin kale, kuwaasoo si diirran u soo dhaweeyay hirgelinta goleyaasha deegaanka, xilli muddo ku siman 30 sano aysan degmada yeelan gole deegaan oo rasmi ah.
Bulshada ayaa u mahadcelisay Dowladda Hirshabelle dadaallada ay ku bixineyso daadejinta awoodaha maamul iyo dib u dhiska hay’adaha dowliga ah ee heer degmo, iyagoo sheegay in gole deegaan oo matala dadka deegaanka uu muhiim u yahay horumarka, wada-tashiga, iyo dowlad-dhisidda sal-ballaaran.
Wasiirka Arrimaha Gudaha, Mudane Cabdiraxmaan Daahir Guure, ayaa sheegay in dhawaan la bilaabi doono wadatashiyo ballaaran oo bulshada la la leeyahay, si dhismaha goleyaasha deegaanka loogu saleeyo rabitaanka iyo matalaadda bulshada, isla markaana bulshada loogu madax-baneeyo hogaankeeda.