Waxaa agaalada Nairobi lagu qabtay Madasha Barakacayaasha Afrika oo ah shir socday saddex maalmood, kaas oo ay si wadajir ah u soo qaban qaabiyeen Hay’adda UNHCR iyo Amahoro Coalition.
Madashan waxaa ka qeybgalay wufuud kala duwan oo ka kala socday qaaradda Afrika, kuwaas oo metelayay dowlado, ganacsiyo gaar loo leeyahay iyo hay’ado caalami ah.
Ujeedada shirka ayaa ahayd sidii xal waara loogu heli lahaa nolosha iyo daryeelka dadka barakacayaasha iyo qaxootiga ee ku sugan qaaradda Afrika, iyada oo diirada la saaray sidii ay isku kaashan lahaayeen dowladaha, hay’adaha gaarka loo leeyahay, iyo bulshada rayidka ah.
Soomaaliya waxaa uga qeyb galay Hey’adda Horumarinta Reer Miyiga, Maamulka Gobolka Banaadir, Shirkadda BECO, Jaamacadda City, Heritage Institute, iyo Hormuud Salaam Foundation.
Waxaa madasha loogu mahad celiyay Hormuud Salaam Foundation, gaar ahaan doorka ay ka qaateen sidii loo kaalmeyn lahaa qaxootiga iyo wax u qabashada baahiyahooda, sidoo kale waxaa lagu boggaadiyay Howlaha Hormuud Telecom iyo Hormuud Salaam Foundation ka wadaan gudaha Soomaaliya, waxaana lagu booriyay in ay sii wadaan.
Guddoomiyaha Hormuud Salaam Foundation, Cabdullaahi Nuur Cismaan oo ka hadlay Madasha ayaa sheegay in ay sii wadi doonaan kaalintooda wax ka qabashada baahiya dadka Barakacayaasha ah.
“Shirka muhiimaddiisu waxa uu ahaa sida Ganacstada ay kaalin uga gaysan lahaayeen dadka Barakacyaasha ah. Sida aad ula socotaan lacagaha ay helaan dadka barakacyaasha waxa ay maraan adeega EVC, taas oo wax wayn u tarta dadka barakacyaasha, iyo dhaqaalaha Soomaaliya,” sida uu yiri Guddoomiyaha HSF.
Agaasimaha Guud ee Xarunta Qurbo Joogta ee Horumarinta Reer Miyiga, Sahro Cabdi oo khudbado ka jeedisay madasha ayaa sheegtay in lagama maarmaan tahay taageero loo muujiyo dadka Barakacayaasha.
Soomaaliya ayaa kamid ah goobaha dadka ugu badan ay ku barkacayeen, sabab la xiriirta colaadaha ka jira dalka.