XAALADDA BELEDWEYNE
Maalmahan waxa Beledweyne laga sheegayaa xalaad ami iyo mid bulsho oo aad iyo aad u hooseysa. Beledweyne waxa ka jira maamulo is-magacaabay iyo kuwa sharci ahaan u jira balse aan laga rabin Beledweyne.
Beledweyne xogtu waxay sheegeysaa in ay ka jirto in kabadan 16 isbaaro oo lagu dhibo dadka safarka ah iyo kuwa reer Hiiraan intaba. Qolo kasta lacag ayay ka qaadayaan gaadiidka. Bal is weydii buubuurka u socda in ka badan 1500km sida Hargeysa, Boosaaso iwm, haddii in ka yar 50km 16 isbaaro mid kastaa lacag aan caqliga galeyn ka rabto oo dad iyo deegaan midna ku laabaneyn, gaarigaas xamuulka uu wado marka uu gaaro Hargeysa ama meel kale meeqa ayuu ku fadhiisanayaa. Ama marka uu soo gaaro Beledweyne gudihiisa.
Dad kala duwan ayaa lagu dilay isbaarooyinkaas kadib markii darawaladu ka keeneen su’aal lacagta la weydiinayo in aysan bixin karin. Yaa masuuliyadda qaadaya dadka sida dadban ama tooska ah loo dilay.
Maamulada kala duwan ee ka jira Beledweyne yaa doortay? Maamulkasta waxa uu leeyahay shacabka ayaan metalaa!! Cajiib haddii aad shacabka matasho maculeys ayaa usoo kordhisay mase Kheyr baad usoo kordhisay!! Xigmad ayaa oroneysa “HADDII AADAN WAX KU KORDHIN KARIN HA UGA DARIN”.
Hiiraan in kabadan 30 masuuliyiin oo iskugu jira Xildhibaano, Sanetaro iyo wasiiro ayaa ugu jirta Dowladda Dhexe xagee ka baxeen, xaaladda Beledweyne ka jirto ma quseyso miyaa? Aaween Dhaqankii gobolka.
YAA QAADAYA DAMBIGA KA DHACAYA BELEDWEYNE
Marka laga tago Madaxweynaha dalka Mudane XSM oo ah ninka dalka loo doortay waxa masuuliyadda qaadaya 30ka masuul ee aan kor kusoo xusay ee heysata metelaadda shacabka na arkaya xaaladda murugsan ee ka jirta gobolka wax tilaabo ahna aan qaadin.
SHACABKA BELEDWEYNE
Shacabka Beledweyne waa in ay gartaan dantooda oo isku soo baxaan dhalinyaro, aqooyahan, culimo, dumar iyo dhaqan, waana in aadan ogolaan in aad ku noolaataan dullinnimo . Waxa aad heystaan barwaaqo aan laga heysan gobolo kale oo Soomaaliyeed hadana adinka ayaa dhinackasta uga baahi badan, taasna wax la aqbali karo maaha. Waxa la joogaa waqtigii aad go’aan weyn oo masiiri ah qadan laheydeen.
==== Dad Dalka U Siman ====