Gabadhan Soomaaliyeed ee caanka ah ee heshay Cabdigii ay ku maansoon jirtay

Ayaan Axmed Caydiid, oo ku magac dheer Ayaan-kaaba, waa abwaanad caan ah oo aad ku barateen maansooyinkeedii taxanaha ahaa, jacaylka iyo madadaalada ahaa ee aadka ugu dhex faafay Soomaali idilkeed.

Silsiladaha maanseed ee hirgalay ee Kaaba billowday, oo marar kala duwan warbixinno ay ka samaysay BBC du ayaa waxa ka mid ahaa middii la magac-baxday IPHONE, tii kale ee WARDA XAASHI NINKEEDA, iyo qaar kale oo badan.

Kaaba ayaa sidoo kale samaysay maansooyin tiro badan oo ay ku baafinayso calafkeeda mustaqbalka, iyada oo marba ku xusaysa deegaan ka mida kuwa soomaalida oo ay ka dhex goobayso cidda ay nolosha la wadaagi lahayd. Ujeedada ay ka lahayd ayaa ahayd iska madadaalo.

Haddaba tixahaas magaca lamaanaha ay raadinayso ayay marar dhowr ah maansadeeda ugu yeedhay magaca Cabdi. Tixahaas ayaa waxa ka mid aha amid ay ku tidhi:

Inta magac cuddoonee

Cajiibee wanaag badan

Cid kastaana leedahay

Cabdi baan u jecelahay

Ayaan Axmed Caydiid Ayaan-kaaba ayaa barteeda Facebook laba maalmood ka hor oo ahayd maalinkii iidda waxa ay soo dhigtay sawirro ay ka soo qaadday saddex post oo ay hore u soo dhigtay barteeda facebuug saddex sanno oo kala duwan.

Saddexda post ayaa ahaa saddexduba kuwo maalmo ciideed ay soo qortay oo ay kula hadlayso calafkeeda mustaqbalka oo xilligaa aanay isba aqoon.

Saddexda postiba isku hal magac ayay calafkaas ugu yeedhay, waana Magaca Cabdi.

Agoosto 10, 2019 kii oo imika laga joogo 5 sano ayay soo qortay posti sidan u dhignaa ‘‘Muddaan kali ciidayee kumee Cabdigaygiiyow”.

Misna sannadkii kaa xigay oo ahayd, May 22, 2020 kii oo ahayd maalin ciid ah oo iminka laga joogo afar sannadood ayay barteeda facebuuga ku soo qortay weedhahan hoose oo la mid ah kuwii sannadkii hore uun. ‘‘Muddaan kali ciidayee kumee Cabdigaygiiyow‘‘.

Isla sannadkii kaas midkii ku sii xigay maalin ciid ahayd ayay haddana ku celisay oo ay soo qortay hadal sidii oo kale u dhigan, oo magaca Cabdi uun ay ku baddashay ‘Calaf’. Weedhahaas ayaa iyaguna u qornaa cayn kan ‘‘Muddaan kali ciidayee kumee calafkaygiiyoow‘‘.

Haddaba waxa yaab leh in dalka maraykanka oo ay dhawaan u guurtay Ayaan, ayna halkaa isku barteen iskuna guursadeen wiil magaciisa layiraahdo Cabdi, waa magacii ay sannaddo badan saadaalinaysay, sugaysay, kuna maansoonaysay iyada oo xitaa aqoon.

Ayaan iyo saygeeda ayaa meherkoodu dhacay dhowr bilood uun ka hor oo ahayd 12 Nov ee sannadkii 2023.

Wariyaha BBC Siddiiq Burmad ayaa maalintii labaad ee ciidda la hadlay ka dib postiyadii ay soo dhigtay, waxaanu waydiiyay muddadaa dheer ee sannadaha ah ee macaga Cabdi ay maansooyinkeeda ku soo qaadanaysay, iyadoo ku tilmaamaysa calafkeeda mustaqbalka, in ay saygeeda hadda guursaday is yaqaaneen?

‘‘Maya, laakiin magaca Cabdi ayaan waligayba iska jeclaa‘‘

Ayaan oo sii sharaxaysa iyada iyo magaca Cabdi xidhiidhka ka dhexeeya ayaa tidhi

‘‘In aan magacaa iska jeclaa waligayba ka sokow, magaca Cabdi suugaantu way qaban ogtahay, oo waa magaca carrabka bulshada iskaga fudud, sugaantana u sahlan inuu hal qabsi u noqdo. Markaa waxa aan dhihi karaa, magaca Cabdi aniga oo jecel ayaa Cabdina yimi oo ilaahay ayaa isku beegay”.

Ayaan oo aannu waydiinay, ‘‘haddii iidihii hore qoraallada aad soo baahinaysay ahaayeen, muddaan kali ciidayee, kumee Cabdi gaygiiyoow, ciiddan maxaad odhanaysaa‘‘ ayaa ku jawaabtay

‘‘Muddaan kali ciidayee, caawaba Cabdigaygiibaan, farxadda la cawaynayaa‘‘.