Madaxweyne Faransiiska, Emmanuel Macron ayaa ku dhawaaqay go’aan adag oo ay ku aqoonsan doonaan Dowladda Falastiin, tillaabadaasi oo ay ka caroodeen Mareykanka iyo Israa’iil.
Macron wuxuu sheegay in go’aanka aqoonsiga Falastiin ay kaga dhawaaqi doonaan kal fadhiga Guud ee Qaramada Midoobay ee bisha Sebtember.
Madaxweynaha Macron ayaa ku dooday in go’aankaasi uu la jaanqaadayo mowqifkooda cadaalad iyo nabad waarta oo ka hana qaadda Bariga Dhexe.
Go’aanka Faransiiska ayaa la micno ah in mid ka mid ah xulafada ugu dhow ee Israa’iil isla markaana ka tirsan dalalka awoodda leh ee G7 uu si cad u jebiyay mowqifka reer Galbeedka ee aan taageerin aqoonsiga Falastiin.
Inkastoo in ka badan 142 dal oo ka mid ah 193-ka waddan ee xubnaha ka ah Qaramada Midoobay ay aqoonsadeen ama ay wadaan qorshaha, haddana dalalka awoodda leh sida Maraykanka, UK iyo Jarmalka ayaa weli ka caga-jiidaya.
Dalalka xubnaha ka ah Midowga Yurub ee Norway, Ireland iyo Spain ayaa bishii May shaaciyay inay bilaabeen geeddi-socodka aqoonsiga Falastiin, hase yeeshee Faransiiska ayaa noqonaya dalka ugu miisaanka culus ee Yurub ee qaada tallaabadaas.
Dhanka kale, dowladda Maraykanka ee uu hoggaamiyo Madaxweyne Donald Trump ayaa ka carrootay go’aanka Faransiiska, iyaga oo aan ka qeybgali doonin shir ay Qaramada Midoobay qorshaynayso oo ku saabsan xal laba-dowladood ah oo ay noqdaan Falastiin iyo Israa’iil.