Taliyaha hey’adda nabad-sugidda ee NISA Mahad Maxamed Salaad ayaa xalay kormeer ku maray qeybo badan oo ka mid ah magaalada Muqdisho, isagoo la afuray ciidamada ammaanka.
Kormeerkan oo Taliye Mahad Salaad ay ku wehlinayeen Taliyaha NISA ee Gobolka Banaadir Muxudiin Warbac iyo Xildhibaan Cismaan Xaadoole oo ka tirsan golaha shacabka, isla markaana ah sarkaal sare oo militeri, ayaa waxaa ka dhashay fal-celin xooggan.
Taliyaha NISA ayaa ciidamada ku kormeeray baraha koontoroolada ee degmooyinka waqooyiga Muqdisho oo dadka iyo gaadiidka ay ku baarayeen, ayada oo Mahad Salaad uu caadi u dhex galay bulshada, isagoo shacabka si gacan qaad ah ugu salaamay maqaayadihii ay ku caweynayeen.
Degmooyinka Yaaqshiid, Heliwaa iyo Kaaraan ayey masuuliyiintaan soo mareen xalay, iyagoo lasoo afuray ciidamada amniga oo isugu jira NISA iyo Booliska.
Haddaba, Sidee looga fal-celiyay?
Abuukar Bashiir: “Ummada waxay u baahan tahay waa amni iyo xasillooni Allaha siiyo, cid walba oo ka shaqeyneysa oo ummadda inay nabad helaan u taagan waan ku taageereynaa.”
Cabdikariim Axmed ayaa isna waxa uu yiri “Fashilka ciidamada xoogga dapka ee furimaha gobollada Galmudug jiro ayaa u baahan u kuur-gelid.”
“Magaalada amni iyo nabad la isku halleyn kari ayay yeelatay, Allaha noo siyaadiyo Taliye Mahad iyo NISA aad ayay ugu amaanan yihiin howshaas qaran,” ayuu yiri Cabdi Nuur Sheekh.
Cali Maxamuud Waddani: “Ciidanka dadka shacabka laynayo wax ka qabo shacabkii baroorasho maalin walba Wiil Soomaaliyeed oo 20 jir ah aa loo dilaa shilimaad oo waliba asiga leeyahay.”
“Taliye NISA oo dhuunta marhore noogu dambeysay Mahad Salaad waa taliye shaqeynaya runtii,” ayuu yiri Saajid Axmed.
Sakariye Cali Dayib: “Waxay ka marqaati kacaysay amniga waddanka inuu hagaagay oo laga raystay dhagartii argagixisada. Hambalyo.”
Xasan Saciid Cirro ayaa sidoo kale waxa uu yiri “Waxaasi shaqo ma ahan waa igu sawir.”
“Dowlada Soomaaliya wadankii dhammaa ma Xamar ayay ka badin waysay,” ayuu yiri Ismaaciil Cabdirashiid oo kamid ah dadka ka fal-celiyay tallaabada uu xalay qaaday Taliyaha NISA Mahad Maxamed Salaad.