Fadeexad weyn oo ka dhalatay gargaar daawo ah oo SODMA geysay gobolka Hiiraan
Waxaa ceeb iyo fadeexad weyn ka dhalatay gargaar daawo aheyd oo maalin ka hor degmada Moqokori ee gobolka Hiiraan uu geeyay gudoomiyaha hay’adda Maareynta Musiibooyinka Qaranka Soomaaliyeed ee SODMA Maxamuud Macalin Cabdulle.
Guddoomiyaha SODMA oo hadal koobna ka jeediyay maalin ka hor munaasabad uu ku wareejinaayay gargaarkaan oo ka koobna dhowr iyo toban kartoon ayaa sheegay iney ku jiraan daawooyin tayo leh oo loogu talo galay ciidanka Macawiisleeyda ee dagaalka kula jira Al-shabaab.
“Waxaan idiin keenay daawo tayo sare leh oo loogu talo galay gargaarka deg dega ah kuna filan ilaa sadax bilood in dhiig joojin loogu sameeyo ciidanka difaaca ee dagaalka kula jiro Al-shabaab” ayuu yiri guddoomiyaha SODMA maruu wareejinayay gargaarkan.
Intaa kadib waxaa lasoo wariyay in kartoonada SODMA geysay Moqokori markii la furay in lagu dhex arkay dharka iyo qalabka kale ee looga gaashaanto cudurka COVID 19, taasina waxay noqotay mid sii kordhisay fadeexad horay uga taagneyd markii horaba dhowrka kartoon ee SODMA laba diyaaradood ku geysay Moqokori.
“Diyaarado dhan ayaa loo soo kireystay dhowr kartoon oo faleenbo ah iyo qalab dhacay oo loogu talagalay la tacaaliddii Covid-19. Waa masuul dowladeed oo yimid furin dagaal, meydba yaala dhaawacyo baa jira hadana wuxuu keenay qalab dhacay oo Covid 19 ah, 24 xabo oo faleebo ah iyo sharoobooyin dhicitaankoodu ka harsan tahay 3 bilood kaliya” ayuu yiri masuul ka tirsan maamulka gobolka Hiiraan..
Si kastaba ha ahaatee dhacdadan ayaa noqotay mida ugu hadal heynta badan saacadahii lasoo dhaafay dhanka baraha bulshada, taasoo dad badan ka yaabisay, mana jiro wax war ah oo wali kasoo baxay dhanka hay’adda SODMA oo ku aadan fadeexada dul hoganeysa.