Wararka ka imaanaya gobolka Galgaduud gaarahana degmada Ceel-dheer ayaa sheegaya in xaaladda deegaankaasi ay deggentahay kadib markii saaka uu halkaa ka dhacay dagaal u dhaxeeyay ciidamada dowladda oo halkaa saldhig ku leh iyo Al-shabaab.
Dagaalka ayaa yimid kadib markii weerar ay Shabaab soo qaadeen waaberigii hore uu ku bilowday qaraxyo kadibana isku badelay dagaal toos ah oo labada dhinac ay isku adeegsadeen hub culus.
Weerarkaan ayay Al-shabaab ku qaadeen laba saldhig oo ay ku sugnaayeen milittariga Soomaaliya gaar ahaan kuwa Gor-gor sida uu wasiirka amniga Galmudug u sheegay BBC-da
Dowladda federaalka Soomaaliya iyo maamulka Galmudug ayaa si isku mid ah u sheegay in dagaalka ay guulo ka gaareen ciidamada dowladda iyo dadka deegaanka oo iska kaashanaya.
Hadal uu bartiisa Facebook, ku faafiyay wasiir ku xigeenka wasaaradda warfaafinta ee dowladda federaalka Cabdiraxmaan Yuusuf Al-Cadaala ayaa waxaa uu ku yiri, ’’Khawaarijta si adag ayaa loogu jabiyay Ceeldheer, Alle ayaa mahadsan, Ciidanka Qaranka iyo Geesiyaasha deegaanku waa mahadsanyihiin, dhamaystirka hawlgalka ayaa socda,’’.
Dhankiisa wasiirka amniga Galmudug Maxamed Cabdi Aadan Gaboobe oo BBC-da la hadlay ayaa sheegay in ciidamada dowladda ay hayeen xogta weerarka oo ay u diyaar garoobeen isla markaana ay kaga awood roonaadeen Shabaabkii weerarka soo qaaday.
Wasiir Gaboobe ayaa intaasi raaciyay in khasaare badan uusan soo gaarin ciidamada dowladda iyo dadka deegaanka.
’’Dhinaca ciidamada khasaare weyn ma gaarin waa uun dhaawacyo ayaa jira ilaaheyna waa u dhib yareeyay markaa sidii ay is lahaayeen iyo sida iyaga dhibka ugu dhacay ayaa aad u kala duwan ilaaheey mahadiis weeye koleey dagaal haduu dhaco dhaawac iyo dhimasho wax uun waa imaanayaan,”.
Dhanka kale warbaahinta taageerta Al-shabaab ayaa baahiyay war ka soo baxay kooxda ay ku sheegteen in dhankooda ay guulo ka gaareen dagaalka isla markaana ku dhawaad 60 askari oo ka tirsan ciidamada dowladda halkaasi ay ku dileen sidoo kale ay hub iyo gaadiid ku qabsadeen.
Marka laga yimaado sheegashada labada dhinac, ma jirto cid si madax bannaan BBC-da ugu xaqiijisay sida halkaa wax uga dhaceen iyo khasaaraha dhabta ah ee kala gaaray.
XIGASHADA SAWIRKA,AFP
Xaaladda goobtii dagaalka
Wararka naga soo gaaraya goobtii uu weerarku ka dhacay ayaa sheegaya in wali uusan deganeyn xaalka goobta oo ay dhaq-dhaqaaqyo amni ay ciidanku ka wadaan aagga ay ku yaaleen fariisamaha.
Xiriiro kala duwan oo aan isku day’nay in aan la sameyno dadka deegaanka ayaan noo suurta galin in helno sababo la xiriira isgaarsiinta degmadaas oo liidata.
Waxaana la soo warinayaa in is-gaarsiinta deegaanka uu sameyn ku yeeshay dagaalku.
Sidoo kale maamulka Galmudug ayaa sheegay in degmada Ceeldheer ay gaareen ciidamada horleh oo ka tirsan kuwa dowladda Soomaaliya iyo kuwa Galmudug oo is garabsanaya.
Mid kamid ah weeraradii u danbeeyay ee Al-shabaab ay ku qaadeen fariisin ciidamad ayaa dhacay bishii Maarso ee sanadkaan iyagoona ku qaaday saldgig ciidamada dowladda Soomaaliya ay ku leeyihiin gobolka Shabeeladda Hoose, gaar ahaan meel u dhaw deegaanka Busleey, iyadoo uu halkaasi ku dhintay Sargaal sare oo ka tirsanaa ciidamada Milatariga oo magaciisa lagu sheegay Liibaan Golcad.