Guddoomiyaha cusub ee gobolka Banaadir ahna duqa magaalada Muqdisho Xasan Muungaab, ayaa seefta xil ka qaadista gasha kala baxay, waxa uuna xalay xilka ka qaaday guddoomiyaashii degmooyinka Dharkeenley iyo Waabari ee gobolka Banaadir.
Sida aan xogta ku helnay guddoomiye Muungaab, ayaa sidoo kale qorsheenaya in uu xilka ka qaado guddoomiyaal kale oo degmo, kuwaa uu aaminsan yahay in aysan aragtidiisa ku shaqeyn karin, sidoo kale aysan la jaanqaadi karin nidaamka uu rabo in uu wax ku maamulo.
Guddoomiyaasha degmooyinka qaarkood , ayaa hadda waxaa lasoo darsay cabsi ku aadan in xilka laga qaado, waxa ayna guddoomiyaashan bilaabeen in ay raadiyaan xildhibaannadii markii hore meesha keenay si ay ugu ilaaliyaan uguna difaacaan kursiga.
Muungaab, oo markii xilka loo magacaabayay Madaxweynaha kula heshiiyay in faraha looga qaado maamulka gobolka looma oggolaado in ciddii uu doono xilka ka qaado kuwa uu doonana magacaabo, taas oo meesha ka saareysa in guddoomiyaal maqaar saar ah awood kale maamulka kusii hayaan.
Guddoomiyaha gobolka Banaadir Muungaab, ayaa lagu xasuustaa in muddo xileedkii hore ee Madaxweyne Xasan Sheekh marka isla xilka loo magacaabay uu xilka ka qaaday guddoomiyaashii degmooyinka gobolka Banaadir, waxa uuna xilligaasi keenay dhallinyaro aqoonyahanno ah oo u badnaa kuwa Sudan wax kusoo bartay.
Duqii hore ee Muqdisho Maxamed Amiir, ayaa shan bil kaddib xilka laga qaaday isaga oon wax is beddel ah ku sameyn maamulada degmooyinka gobolka Banaadir, halka Muungaab oo hadda xilka haya muddo isbuuc ah uu xilka ka qaaday labo guddoomiye degmo, kuwa kalana hadda uu qorsheenayo.