Madaxweynaha Mareykanka Donald Trump ayaa difaacay qorshaha uu ku doonayo in hadiyad ahaan u helo diyaarad cusub oo nooca raaxada ah oo Boeing, kaddib markii ay warbaahintu sheegtay in uu diyaarad ka heli doono qoyska boqortooyada Qatar, si uu u beddelo diyaaradda hadda uu isticmaalo Madaxweynaha Mareykanka.
Diyaaraddan oo nooceedu ah Boeing 747-8 jumbo jet, ayaa waxaa telefishinka ABC News ku tilmaamay “qasri duulaya”, isagoo sheegay inay suurtogal tahay inay noqon doonto hadyad tii ugu qaalisanayd ee abid ay hesho dawladda Maraykanka.
Dadka dhaleeceeya ayaa sheegaya in aqbalka hadiyaddan oo kale ay jabin karto shuruuc adag oo ku saabsan hadiyadaha madaxweynayaasha Mareykanka iyo in ay soo saarto su’aalo kale oo la xiriira iskahorimaadyada danaha ganacsiga qoyska Trump iyo xafiiska Madaxtooyadda.
Dastuurka Maraykanku waxa uu ka mamnuucayaa saraakiisha dawladda in ay ka qaataan hadiyadaha “Boqor, Amiir ama Dawlad shisheeye.”
Trump ayaa sheegay in xisbiga mucaaradka ah ee Dimuquraadiga uu ku qaldan yahay diidmada hadiyaddan.
Madaxweynaha Mareykanka Donald Trump, ayaa maanta tagay Boqortooyada Sacuuduga, waxa uuna beri tagi doonaa magaalada Doha ee caasimadad dalka Qatar, isaga oo uga sii gudbi doona dalka Imaaraadka Carabta.