Iyadoo bisha barakeysan ee Ramadaan heer gebogebo ah mareyso ayaa waxaa magaalada Muqdisho qeybaheeda kala gedisan laga dareemayaa diyaar garow wejiyo kala duwan leh oo qeybaha bulshadu ugu jiraan soo dhoweynta munaasabada ciidul fitriga oo la hadal hayo iney ku beegan tahay Talaadada ama arbacada todobaadkan.
Meelaha ugu daran ee laga dareemayo diyaar garowga ciida ayaa waxaa ka mid ah suuqyada bacadlayaasha ah sida Xamar-weyne, Bakaaraha, Suuq-bacaad iyo qaar kale oo lagu arkayo dad u badan haween jiidaya caruur loo soo iibinayo dharkii ciida iyo waxyabaaha kale ee lagu ciyaaro, iyadoo mararka qaarkoodna ciriiri awgeed dadku ay isbuuranayaan.
Waxaa sidoo mashquul fara badan laga dareemayaa goobo badan oo ay ka mid yihiin timajarayaasha goobaha dumarku isku qurxiyaan ee loo yaqaano Beauty Sallon-ka, dawaar layaasha dharka tola iyo foornooyinka lagu dubo buskutka iyo doolshaha oo haween fara badan ay buux dhaafiyeen.
Waxa jira dad fara badan oo tuban goobaha lagu iibiyo macmacaanada kala duwan kuwaasoo iibsanaya waxyaabo ay ka mid yihiin xalwooyin kala jaad ah iyo macmacaano kale oo ay ka mid yihiin baal-baalow, Shushumow iyo noocyo kale oo, waxaana cabashada ugu weyn ee dadku ka qabaan ay tahay sicir barar saameeyey suuqyada.
Ganacsatada iibisa dharka noocyadiisa kala duwan ayaa sheegay in suuqu sanadkan uu yahay mid shidan oo dadweynuhu ay si aad ah wax u iibsanayaan iyagoo xusay in sanad walba ay bisha Ramadaan ku xisaabtamaan maadaama uu xoogeysanayo ganacsiga iyo wax kala iibsiga.
Dhinaca kale waxaa jira dad danyar ah oo ku nool xeryaha barakacayaasha iyo xaafadaha magaalada Muqdisho qaarkood oo intooda badan indhaha ka daawanaya diyaar garowga asaagood ay ugu jiraan ciida, duruufaha nololeed ee heysa awgood, iyadoo waxa kaliya ee ay ka fekeraana ay tahay sidii ay u heli lahaayeen nolol maalmeedkooda.