Magaalada Muqdisho waxaa maanta ka dhacay Dibadbax lagu taageerayo heshiiska Difaaca & Dhaqaalaha la xiriira oo dhowaan ay wada galeen Dowladaha Soomaaliya & Turkiga waxaana ka qaybgalay mas’uuliyiin katirsan Dowladda Federaalka.
Guddoomiyaha Gobolka Banaadir ahna Duqa Muqdisho, ku xigeennadiisa, Xubno katirsan labada Gole ee Baarlamaanka 11aad, Wasiirro, aqoonyahanno iyo mas’uuliyiin kale ayaa ka qaybgalay dibadbaxaan.
Dad wata boorar lagu xardhay ereyo lagu taageerayo heshiiska Jamhuuriyadaha Soomaaliya & Turkiga oo isaga kala yimid Degmooyinka Gobolka Banaadir ayaa qayb ka ahaa isusoobaxaan maanta ka dhacay Magaalada Muqdisho.
Mas’uuliyiin madasha ka hadashay ayaa sheegay in ay bogaadinayaan heshiiskaan oo muhiimad gaar ah u leh maadaama Golaha Wasiirrada & Baarlamaanka Jamhuuriyadda Federaalka Soomaaliya ay ansixiyeen halka uu saxiixay Madaxweyne Xasan Sheekh Maxamuud.
Heshiiska Difaaca iyo dhaqaalaha ee Soomaaliya & Turkiga ayaa soconaya muddo 10-sano ah waxaana jira kara waqti kordhin ay samayn karaan labadaan Jamhuuriyadood hadba sida ay isugu fahmaan sida ay sheegeen madaxda labada Dal.