Ciidamada xoogga dalka Soomaaliyeed oo garab ka helaya kuwa Jubbaland ayaa subaxnimadii hore ee saaka fashiliyay weerar Al-shabaab ay ku qaadeen deegaanka Baarsanguuni ee gobolka Jubbada Hoose, sida ay sheegtay warbaahinta dowladda.
Warka ka soo baxay warbaahinta dowladda ayaa lagu yiri, “Ciidanka xoogga dalka qaybta 43-aad iyo kuwa Jubbaland ayaa fashiliyey weerar ay doonayeen kooxda Khawaarijta ah inay ku qaadaan deegaanka Barsanguuni ee Gobolka Jubbada Hoose. Ciidamada Qaranka waxaa u suurta-gashay inay ka hor tagaan weerarkii Khaawarijta oo xogtiisa la sii hayey, waxaana socda weli socda howlgal looga dilay dhagarqabayaal badan, kuwaas oo meedadkooda ay goobta saadsan yihiin.”
Weerarka ay kooxdan ku qaadeen deegaanka Baarsanguuni ayaa ku soo aadaya iyadoo maalintii labaad ee Ciidul Fidriga ay ku beegan tahay iyadoo ciidamada ammaanka ay ka feejigan yihiin wax kasta oo amniga keeni kara.
Ciidamada Soomaaliya oo garab ka helaya kuwa deegaanka iyo saaxiibo caalami ah oo dhanka ammaanka ah ayaa tan iyo sanadkii 2022 ku guda jiray weeraro culus oo ka dhan ah kooxda Al-Shabaab, markaasoo uu madaxweynaha ku dhawaaqay dagaal ka dhan ah.