Odayaal mucaaraday dowladda Madaxweyne Xasan oo xabsi
Wararka ka imaanaya degmada Garbahaarey ee gobolka Gedo, ayaa sheegaya in xabsi la dhigay qaar kamid ah odayaasha dhaqanka degmadaasi, kuwaa oo shalay warbaahinta la hadlay eedeyna u jeediyay dowladda uu hoggaamiyo Madaxweyne Xasan Sheekh.
Telefishinka ku hadla afka maamulka Jubbaland, ayaa baahiyay in ciidamo ka amar qaata maamulka Madaxweyne Xasan Sheekh in xabsiga dhigeen odayaashan kahor yimid qorshaha dowladda Jubbaland uga jareyso gobolka Gedo.
Odayaasha xabsiga la dhigay, ayaa si adag uga dhiidhiyay sida dowladda Soomaaliya ula dhaqmeyso maamulka Jubbaland iyo qorshaha gobolka Gedo uga jareyso maamulka Jubbaland, waxa ayna caddeeyeen odayaasha la xiray in aysan raali ka aheyn sida dowladda wax u wado.
Sida aan xogta ku heleyno odayaasha la xir xiray ayaa lagu qasbayaa in ay ka laabtaan hadalkii ay shalay jeediyeen kuna dhawaaqaan mid ka geddisan warkoodii hore raaligelinna bixiyaan, si xurriyadooda dib loogu soo celiyo odayaasha dhaqanka ee Garbahaarey.
Dowladda Soomaaliya, ayaa wada qorshe ay maamul gaar ah ugu sameeneyso gobolka Gedo, si looga jaro maamulka Jubbaland ayna dowladda degmooyin katirsan gobolkaasi uga qabato doorashada qof iyo codka ah ay rabto in dowladda hirgaliso.