Maxkamad ku taalla magaalada Jigjiga ayaa maanta xukun xabsi ah ku riday Cabdi Barrud, oo Kamid ah Dhalinyarada Soomaaliyeed ee wax ku qora baraha Bulshada, kaddib markii lagu soo eedeeyay inuu qoray faallo (Comment)– inkastoo uu si cad u beeniyay eedeyntaasi.
Faallada lagu soo eedeeyay Cabdi ayaan ilaa hadda si rasmi ah loo shaacin halka laga qoray, mana jirto cadeyn muuqata oo muujinaysa inuu isagu qoray. Intii uu xirnaa, Cabdi Barrud wuxuu si isdaba joog ah u sheegay inuusan qoraalkaas lahayn, isagoo xusay in ay tahay mid Photoshop lagu sameeyay.
Xukunkan ayaa durba dhaliyay falcelin xooggan oo dhinacyo badan leh, iyadoo dadka u dooda xuquuqul insaanka ay ku tilmaameen mid ceeb ku ah nidaamka garsoorka ee deegaanka Soomaalida.
Waxaa isa soo taraya tuhunka ah in kiiska Cabdi Barrud uu yahay mid siyaasadeysan, loona adeegsaday inuu cabsi gelin ku noqdo dadka leh aragtiyo madax-bannaan ama dhaliilaya maamulka hadda talada haya.
Madaxweynaha Deegaanka Mustafa Cagjar ayaa dhawaan sheegay in qofka loo xiri karro faallo uu baraha bulshada ka dhiibtay.