FALAQEYN: Dhacdooyinka Ugu Dambeeyay ee Iraan iyo Isra’iil
Iraan ayaa mar kale qaaday weerar ballaaran oo ay ku beegsatay magaalooyinka Tel Aviv iyo Haifa. Gantaallo iyo diyaarado aan duuliye lahayn ayaa sababay dhimashada ugu yaraan 8 qof, halka boqolaal kalena ay ku dhaawacmeen. Dhinaca kale, Isra’iil ayaa jawaab degdeg ah bixisay iyadoo duqeymo culus ku qaaday xarumo milatari iyo warshado hubka lagu sameeyo oo ku yaalla gudaha Iran, gaar ahaan kuwa lagu tuhunsan yahay in lagu kaydiyo ama lagu farsameeyo gantaallada ridada dheer
Wararka hordhaca ah waxay muujinayaan in Iran ay sheegtay in khasaarah dhimashada iyo dhaawac ah uu gaaray 224 ilaa 406 qof, badankoodna ay yihiin rayid. Isra’iil waxay sheegtay 14 ilaa 24 dhimasho ah. Sidoo kale, burbur hantiyadeed iyo mid kaabayaal ah ayaa laga soo sheegay dhanka Iraan iyo Isra’iil labadaba.
Madaxweynaha Mareykanka, Donald Trump, ayaa digniin adag u diray Iraan, isagoo sheegay in weerar kasta oo lagu qaado danaha Mareykanka uu noqon doono khatarta aan la aqbali karin. Midowga Yurub iyo dalalka G7 ayaa bilaabay shir degdeg ah oo looga hadlayo sidii loo yareyn lahaa xiisadda. Dalka Turkiga wuxuu isu muujiyay diyaar garow uu ku dhexdhexaadinayo labada dal, halka Ruushka uu sidoo kale wacad ku maray inuu ka shaqeyn doono xal nabadeed. Shiinaha wuxuu ugu baaqay labada dhinac inay joojiyaan iska horimaadka oo ay bilaabaan wada-hadal degdeg ah.
Qiimaha saliidda adduunka ayaa sare u kacay saacadihii u dambeeyay, waxaana la filayaa in uu kor u sii kaco haddii colaadda sii socoto. Sidoo kale, dalxiisayaal iyo muwaadiniin ajaanib ah ayaa lagu xayiray wadamo dhowr ah oo xiriir la leh gobolka, taasoo keentay cabsi ballaaran oo ku saabsan amniga ajaaniibtaas
Dagaalka u dhexeeya Iraan iyo Isra’iil wuxuu hadda u muuqdaa mid isu beddelay mid baaxad leh oo laga yaabo inuu ku fido guud ahaan Bariga Dhexe. Labada dalba waxay muujiyeen awood ciidan oo weyn, balse ma jiraan calaamado muujinaya in midkood diyaar u yahay wada-hadal degdeg ah. Caalamka intiisa badan wuxuu doonayaa yareynta xiisadda, hase yeeshee xaaladda dhabta ah ee ka jirta wali wa mid qalafsan. Haddii wax xal ah la helin, khatarta dagaal ballaaran oo gobolka oo dhan saameeya ayaa aad u sareysa.