WARSAXAAFADEED
Wasaaradda Gargaarka iyo Maareynta Masiibooyinka ee Dowladda Hirshabelle waxay si rasmi ah u shaacisay in ay jartay xiriirkii wada-shaqeyneed ee kala dhexeeyay Guddoomiyaha Hay’adda Maareynta Musiibooyinka Qaranka, Mudane Mohamud Mo’alim. Go’aankan waxa uu salka ku hayaa is-faham la’aan joogto ah, ku tagrifal gargaarka loogu talagalay shacabka Hirshabelle, iyo hufnaan la’aan ka muuqata hab-maamulkii gargaarka, gaar ahaan dhacdadii dhawaan ka dhacday degmada Moqokori ee la geeyay afar kartoon oo dawo ah si aan habboonayn.
Wasaaraddu waxay si cad u muujineysaa in uusan Guddoomiyuhu matali karin danaha shacabka Hirshabelle marka la eego howlaha la xiriira gargaarka iyo maareynta musiibooyinka. Waxaana la ogeysiinayaa dhammaan hay’adaha ay khuseyso in ay ixtiraamaan mowqifka rasmiga ah ee Wasaaradda, iyada oo lagu saleynayo daahfurnaan, isla xisaabtan iyo u hiilinta dadka nugul ee deegaanka.