Guddiga Doorashooyinka Somaliya Oo Shaaciyay in Khuburo Reer Somaliland ah ka Caawinayaan Doorashada Qof iyo Codka ah
Guddoomiyaha guddiga doorashooyinka Qaranka Soomaaliya Cabdikariin Axmed Xasan ayaa maanta shaaca ka qaaday in khuburro reer Somaliland ah qeyb ka guddiga madaxabanaan ee Doorashooyinka iyo Soohdimaha Qaranka Soomaaluya.
Guddoomiye Cabdikariin Axmed Xasan ayaa sheegay in xubnaha khubarada ee Somaliland ay ka caawinayaan hagista iyo nidaaminta doorashada qof iyo cod ah.
“Guddiga Doorashooyinka iyo Soohdimaha Qaranka waxaa xubno ka ah laba xubnood oo ah khubaro aan ka keenay Somaliland oo si weyn u yaqaano hanaanka shaqo ee hirgalinta doorashooyinka golaha deegaanka, maadama Somaliland ay ku gaamurtay qabashada doorashooyinka golaha deegaanka, labadan xubnood waxan ka dhageysana talooyinka iyo fikradaha la xariira howlaha doorasho ee golayaaasha deegaanka” ayuu yiri guddoomiyaha guddiga Doorashooyinka iyo Soohdimaha Qaranka Cabdikariin Axmed Xasan.
Wuxuu sidoo kale tilmaamay guddoomiye Cabdikariin in guddigooda uu ka shaqeynayo sidii dalka uu u gaari lahaa doorasho qof iyo cod ah oo ay ugu horeeyaan golayaasha deegaanka.
“Dal dhismahiisa waxuu kasoo bilawda degmo Caafimaad qabta oo sii doorata gobol caafimaad qaba oo isna usii gudba State Caafimaad qaba markaas kadib ayaana la heli karaa dowlad dhexe, marka anaga waxaan xooga saareyna inaan qabano doorasho gole deegaan oo caafimaad qabta” ayuu yiri guddoomiyaha guddiga doorashooyinka qaranka Cabdikariin Axmed Xasan.
Hadalkaan kasoo yeeray guddoomiyaha guddiga doorashooyinka qaranka ayaa kusoo aadaya, iyadoo degmooyinka gobolka Banaadir maalmahii lasoo dhaafay ka socdeen diiwaan galinta codbiyaasha golaha deegaanka ee degmooyinka magaalada Muqdisho.