Dowladda Turkiga ayaa sii daysay barnaamij gaara oo lagu caawinayo lamaanayaasha doonaya iney is guursadaan sanadkan 2025.
Dowlada Turkigu waxay lamaane kasta oo doonaya iney is guursadaan siinaysaa lacag amaaha oo dhan 150,000 TL oo u dhiganta 3869 dollar, waana lacag bilaa ribo ah oo loogu talagalay iney lamaanuhu nolol ku sameystaan.
Qaabka lacagtan loo bixinayo, waa in lamaanaha labada sano ee ugu horeysa wax lacaga iney bixiyaan laga rabin. ujeedada tan loo sameeyay waa in lamaanaha cusubi ka walwalin deynta si ay nolol u dhistaan, labada sano ee hore marka ay dhamaadaan waxaa lamaanaha laga rabaa iney deynta bixiyaan waxayna ku bixinayaan mudo afar sano ah.
Waxaa kale oo shuruudaha kamid ah hadii lamaanaha cusubi ay ilmo dhalaan inta lagu guda jiro afarta sano ee deynta bixinta waxay codsan karaan in sanad dheeri ah loogu daro mudada deyn bixinta.
dhanka kale dowlada wadanka Turkigu waxay waalid kasta oo ilmo dhala sanadkan 2025 iyo wixii ka danbeeya siineysaa kaalmo dhaqaale.
Ilmaha koobaad ee sanadkan dhasha waxaa waalidiinta dhalay lagu siinayaa 5000 TL oo u dhiganta 129 dollar, waana kaalmo halmar ah.
Laakin hadii uu ilmo labaad dhalo wuxuu waalidkaasi ku helayaa 1500 TL oo u dhiganta 38 dollar oo bil kasta uu qaadanayo mudo shan sano ah sidoo kale hadii ilmo sedexaad dhalo wuxuu waalidku helayaa 5000 TL oo u dhiganta 129 dollar bil kasta mudo shan sano ah oo xidhiidha.
Madaxweynaha Turkiga ayaa ku dhawaaqay in sanadkan 2025 uu yahay sanadka qoyska, wuxuuna qaadayaa talaabooyin dhaqaale oo lagu dhiirigalinayo guurka, dhalmada iyo qoys dhisida si kor loogu qaado tirada dadweynaha Turkiga loolana dagaalamo dhaqamada xun ee halista ku ah qoysaska sida khaniisnimada oo kale.