: Dagaal Ka Dhacay Balad Xaawo Khasaaro Ka Dhashay Madaafiic ku Dhacday Goobo Shacabku Daganyihiin,
Waxaa maanta dagaal culus uu ka qarxay gudaha degmada Balad Xaawo, kaas oo u dhexeeyay ciidamada dowladda Federaalka Soomaaliya iyo kuwa maamulka Jubaland. Dagaalka oo muddo saacado ah socday ayaa sababay khasaare isugu jira dhimasho, dhaawac iyo burbur hantiyadeed.
Wararka laga helayo ilo deegaanka ah ayaa sheegaya in madaafiic culus oo lagu is-weydaarsaday magaalada ay ku habsadeen guryo ay daganaayeen dad rayid ah. Inta la xaqiijiyay, waxaa jira dhaawacyo soo gaaray dad shacab ah, iyadoo ay jiraan qoysas badan oo ka barakacay xaafadaha ay colaadu saameysay.
Dadka deegaanka ayaa sheegay in xaaladda si lama filaan ah ku kacsatay, isla markaana dad badan ay u carareen masaajidda si ay ugu badbaadaan rasaasta iyo madaafiicda socda.
Ilaa iyo hadda lama helin tiro rasmi ah oo ku saabsan khasaaraha rasmiga ah ee dagaalka, maadaama labada dhinac aysan weli si faahfaahsan uga hadlin dhacdada.
Xaaladda guud ee magaalada ayaa weli kacsan, iyadoo laga cabsi qabo in dagaalku dib u qarxo. Dadka deegaanka ayaa baaq u diraya dowladda dhexe iyo dhinacyada ku lugta leh in la joojiyo dagaalka oo la badbaadiyo nolosha shacabka.